“Насаф” – “Ал-Аҳли” 2:1 учрашувидан кейинги бўлиб ўтган матбуот анжуманининг иккинчи қисмида мезбон жамоа бош мураббийи Рўзиқул Бердиев ва учрашув қаҳрамонларидан бири- Бобур Абдуҳолиқовлар иштирок этишди.
Рўзиқул Бердиев:“Бугунги ғалаба билан барча мухлисларни табриклайман. “Ал Аҳли” жамоаси ўйинларини яхши ўрганиб чиққанимиз бугун иш берди.
Ўйинчиларимизга атайлаб вақт чўзишни ўргатмаймиз, аммо бундай ўйинларда вазиятга қараб иш тутиш фойдадан ҳоли бўлмайди.
Бойдуллаевни қизил карточкаси бўйича ОФКга берган аппелациямизни кўриб чиқилиши анча чўзилиши мумкин. Бу масала бўйича қарор қабул қилинмагунча унинг хизматидан фойдалана олмаймиз.
Тўғри, бугунги ўйинимиз жуда катта босим остида кечди. Шунданда айрим футболчиларимизда ҳаяжон ҳам кучли бўлди, оқибатида айрим хатоларга йўл қўйдик. Бу ҳолат бундай учрашувларда бари бир содир бўлади. “Ал-Аҳли”нинг ҳимоясидаги камчиликларни билардик, йигитларимиз бундан фойдаланишга ҳаракат қилишди. Умумий қилиб айтганда вазиятни назорат қилишни эпладик.
Юқорида айтиб ўтганимдек, бундай ўйинларда футболчиларда ҳис-ҳаяжон кучли бўлади. Айрим пайтларда улар ўзларини тўлиқ назорат қила олишмайди, бугун ҳам шундай муаммолар бўлди. Бунинг устида ҳали ишлаймиз.
Бобур Абдуҳолиқов:
– Мухлисларимизни қувонтирганимиздан хурсандмиз. Бугун яхши ўйин бўлди ва биз ғалаба қозондик. Биринчи бўлимдаги вазиятлардан фойдалана олмадик, иккинчисида эса мураббийимиз берган кўрсатмаларни тўлиқ бажара олдик деб, ўйлайман.
Рўзиқул Бердиев ҳам журналистларнинг бошқа қизиқтирган саволларига жавоб бериб ўтди.
