“Металлург” – “Сўғдиёна” учрашувидан кейин биз ҳар иккала жамоаларнинг мураббийларини матбуот анжуманига таклиф этдик.

Шавкат Саидов, “Металлург” ФК жамоа бошлиғи:“Чемпионатнинг биринчи тури ҳамиша қийин кечади. Айниқса талабчан мухлислар қаршисида ўйнаш оғир. Биз бу ўйинга жиддий ҳозирлик кўргандик. Ўзларингиз шоҳиди бўлдингиз, бутун ўйин давомида “Металлург” катта устунликка эга бўлди. Барча вазиятлардан фойдаланганимизда йирик ҳисобда зафар қучардик. Аммо ёшларимиздаги тажрибасизлик, биринчи ўйиндаги ҳаяжон вазиятлардан фойдаланишда ўйинчиларимизга халақит берди.   Мавсумга тайёргарлик жараёнида жамоамизда катта ўзгаришлар бўлди. клубни тарк этганлар ўрни ёш, иқтидорли ўйинчилар билан тўлдирилди. Улар келгуси ўйинларда албатта ўзларини кўрсатишларига ишонаман. Бунинг учун бироз вақт керак.   Бугунги ўйинда барча йигитларимиздаги ғалабага бўлган иштиёқини алоҳида эътироф этган бўлардим. Клуб мутассаддилари томонидан жамоага барча шарт-шароитлар яратиб берилмоқда. Ўтган йилги ҳисоб-китоб ишлари ўз вақтида бажарилди. Янги мавсум арафасида ҳам қарздорлик йўқ. Шундай экан, муассисларимиз, мухлисларимиз ишончини оқлаш учун фақатгина ўйнашимиз, керакли натижаларни кўрсатишимиз лозим.   Янги мавсумдаги вазифа? Биринчи навбатда ўз уйимиздаги барча ўйинларда чиройли, ҳужумкор ўйинларимиз билан мухлисларимизни хурсанд этиш, ғалаба қозонишдир. Сафар ўйинларида ҳам имкон даражасида очко жамғаришга ҳаракат қиламиз. Максимум вазифа кучли олтиталикка кириш, минимум натижа ўнталикдан тушиб кетмаслик.”