«Лестер» устози жорий мавсумдаги фаолияти билан ўз обрўсини анча ошириб олди. Хусусан, итальян мутахассисининг тили ҳам тобора «ўткирлашиб» боряпти. Хуллас, у футбол ҳақида оддий, аммо гўзал гапириш мумкинлигини исботлаяпти. Мана, «Лестер»дек камтарин клубни фантастик даражада чемпионлик курашига қўшган мураббийнинг айрим иборалари билан танишиб, бунга ўзингиз ишонч ҳосил қилишингиз мумкин.
- Агар Маҳрез бошқа жамоалар ҳақида ўйлай бошласа, унда мен билан захира ўриндиғида ўтиришига тўғри келади.
- Мен альпинист эмасман, аммо спортда фақат юқорига қараш ва ҳар қандай ҳолатда пастга қиё боқмаслик муҳим эканлигини яхши биламан.
- Ҳа, инглиз тили бўйича муаммоларим бор - барча саволларни тўлиқ тушунмайман. Шунинг учун ҳам, ўзимга таниш сўзни эшитганим ҳамоно жавоб қайтаришни пайсалга солмайман.
- Жамоа билан орзу қилишда давом этамиз ва илтимос, ҳеч ким бизни уйғотмасин!
- Баъзан шундай бўладики, биз ҳўкиздай ишлаймиз...
- Чемпионлик? «Ҳа, биз бунга қодирмиз», - дейишни хоҳлардим, аммо мен Обама эмасман-да.
-«Yes we can, дейишни хоҳлардим, аммо мен Обама эмасман-да».
Айтганча…
Клаудио Раньери Италия терма жамоасини бошқариши мумкинлиги ҳақидаги хабарларни инкор этди. «Аслида ўз ватаним миллий жамоасига устозлик қилишдан фақат хурсанд бўлардим. Бироқ бу шунчаки, миш-миш. Айни пайт бор диққат-эътиборим «Лестер»га қаратилган. Сўнгги бор терма жамоа билан ишлаганим (Греция термаси назарда тутилмоқда)да барчаси жуда омадсиз чиққанди. Хуллас, буларнинг ҳаммаси қуруқ гап...»,- деди Раньери.
