Ҳозиргина якунланган "Машъал" - "Металлург" (4:0) учрашувидан сўнг ҳар икки жамоа бош мураббийлари ўйин ҳақида фикрларини билдириб ўтди. Дастлаб бекободликлар мураббийи Одил Исабоев ўйин ҳақида айтиб ўтди. "Машъал" жамоасидан эса бош мураббий Бахтиёр Саттаров ўйинда иштирок эта олмагани боис катта мураббий Мақсуд Ирисбоев ўйин ҳақида гапириб ўтди. 

"Машъал" ёшларини ғалаба билан табриклайман. Бугун майдон ҳолати яхши бўлмади. Мен буни баҳона сифатида кўрсатмоқчи эмасман. Рақибимиз бизга нисбатан бир неча баробар яхшироқ ўйнади. Ўз майдонида тадбир билан бошлади ва улар мухлисларини хурсанд этди. Асосий мақсадимиз бош жамоамизга юқори савияли футболчиларни етказиб беришдир. Маҳаллий ёшларга кўпроқ эътибор қаратган ҳолда уларни тарбиялаб беришга ҳаракат қиламаиз. Худо хохласа яқин йилларда жамоамиз учун ушбу таркибдан кучли футболчилар етишиб чиқади" , - дейди Одил Исабоев.

"Бугун кўплаб ёшларни майдонга туширдик. Улар ўзларини ижобий жиҳатларини кўрсатмоқда. Жуда кўп йигитлар истедодли ва яқин йилларда асосий таркибдан жой олишига ишонаман. Ўйин ёмон бўлмади ва ҳаммани ҳаракатидан қониқдим. Улар имконияти борича ҳаракат қилишди. Натижа ўйинга мос бўлди. Энг асосий мақсадимиз футбол мактабимиз ёшларини етук футболчилар қилиб тарбиялашдир", - дейди Мақсуд Ирисбоев.