"Пахтакор" - "Қўқон-1912" учрашувидан кейинги матбуот анжуманида меҳмонлар бош мураббийи Мурод Исмоилов ўйин ҳақида фикрларини билдириб ўтди.

"Бугун ўйинимиз умуман қовушмади. Бошқача изоҳ шарт эмас деб ўйлайман. Таҳлил қилиб чиққач, хатоларимизни билиб оламиз. Буни икки оғиз гап билан тушунтириш қийин. Жамоани шакллантиришда ўзим танлаган ўйинчилардан фойдаланаман. Натижа ёмон бўлган экан, бунда мен айбдорман. Қурбонов жароҳатдан қайтганди ва у ўйинга тўлиқ тайёр эмас экан. Шу сабабли уни биринчи бўлимдаёқ алмаштирдим.

Турли жиҳатларда камчиликларга эгамиз. Уларни тузатиш устида ишлашимиз керак. Таркибда жами 9 ўзгариш бўлган. Лекин янги футболчилар бўлган тақдирда ҳам бундан яхши ўйин намойиш қилишимиз лозим. Йигитларга майдонда амалга ошириш керак бўлган кўрсатмаларни айтгандик, лекин улар буни бажара олишмади. Футболчиларни танлашда хато қилган бўлишим мумкин. Баъзида бундай ўйинлар рўй бериб туради. Гап йирик ҳисобда ютқазишда ҳам эмас. Ҳар доим жанговар ўйнашга, охиригача курашишга интилиш шарт" - дейди Мурод Исмоилов.