“Қизилқум” — “Орол” жамоалари учрашуви (5:0) якунлангач, матбуот анжумани биринчи қисмида мезбонлар бош менежери Ҳамиджон Актамов иштирок этди.

— Ўзбекистон кубоги дастлабки босқичини ғалаба билан бошлаганимиздан хурсандмиз, — дея сўз бошлади Ҳамиджон Ғуломович. — Барча рақибларимизга ҳурмат билан қараймиз. Қолаверса, чемпионатда юзага келган танаффусдан унумли фойдаланиб, асосий таркиб ўйинчиларига бугун эътибор қаратдик. 

Бугун асосий таркибнинг тўрт нафар ўйинчимиздан ташқари барчага имконият бердик. Захирадаги футболчиларимизни ҳам кўздан кечириб олдик. Учрашув бошида йигитларнинг ўйинга киришиб кетиши бироз қийин бўлди. Якунда улар ўз ўйинларини топиб олдилар.

Олдинда Ўзбекистон кубоги 1/8 финал босқичидан жой олган “Андижон” жамоасига қарши муҳим учрашув турибди. Бу ўйин 25 март куни  Навоийда ўтказилади. Жавоб учрашувидан олдин мухлисларимизни яна бир қувонтиришга ҳаракат қиламиз, албатта. Мақсадимиз — бу йил Ўзбекистон кубогида ғалабаларга бой ўйинлар намойиш этиб, юқори натижаларни қайд этишдир.