Швециялик ҳужумчи Златан Ибрагимович футбол бўйича Хитой чемпионатида тўп суришга розилик билдирса, жаҳоннинг энг кўп маош оладиган футболчисига айланади. Бу ҳақда, La Repubblica нашрига асосланиб, «Chempionat.com» хабар берди.

Хитойликлар швециялик юлдуз футболчи мамлакат Суперлигасининг юзи бўлишини истамоқда, бу йўлда улар, хабар беришларича, Златан Ибрагимовичга йилига 75 миллион евро маош тўлашга рози.

Айни вақтда Франциянинг «ПСЖ» клуби шарафини ҳимоя қилаётган Ибрагимовичга Хитойнинг қайси клуби таклиф билан чиқиши ҳозирча номаълум. Бироқ 34 ёшли ҳужумчини Хитойга таклиф қилиш ғояси бевосита мамлакат ҳукуматидан чиққани айтилмоқда.

Маълумот учун, Ибрагимович 2015/2016 йилги мавсум давомида «ПСЖ» учун Франция чемпионатида 25 та ўйин ўтказиб, 27 та гол уришга муваффақ бўлди. Унинг клуб билан шартномаси 2016 йил ёзида ниҳоясига етади.