«Олтин тўп–2015» тақдимот маросими бошловчиси Кейт Эбдо мазкур мукофотга даъвогар бўлган футболчилар хатти-ҳаракатлари ҳақида гапириб берди, деб хабар қилади «Sports.ru».

«Месси жуда хотиржам ва сокин эди. У оғир ва босиқ, ҳатто бироз тортинчоқ. Роналду эса ҳар доимгидек ўзига ишонган ҳолатда бўлиб, камералар қаршисида ўзини эркин тутди. Бу жуда қизиқарли бўлди. Чунки биз Роналдуни ТВ орқали жуда кўп кўрганмиз. У катта бренд ва бутун дунё уни яхши танийди.

Роналду маросимда Неймар билан бирга бўлди. Месси ва Неймар жамоадош бўлишига қарамай, айнан Роналду бразилиялик футболчини ҳамма жой билан таништирди ва Неймарга ҳамма гапларни таржима қилиб беришларига кўз-қулоқ бўлиб турди. Португалиялик ҳужумчи Неймарга нисбатан анча ғамхўр эди. У нима қилаётганини биларди. Менимча, буни ҳеч ким кутмаган эди», – дейди маросим бошловчиси Кейт Эбдо.

Эслатиб ўтамиз, Аргентина миллий терма жамоаси ва Каталониянинг «Барселона» клуби ҳужумчиси Лионель Месси 2015 йил якунларига кўра жаҳоннинг энг яхши футболчиси деб топилган эди.