Япониянинг “Йокогама” жамоаси ҳужумчиси Казуйоши Миура яқинда 49 ёшини қарши олгани ва жаҳондаги энг “кекса футболчи” номини ўзида сақлаб тургани ҳақида маълумот берган эдик.

Таъкидлаш жоиз, сал кам 50 ёшни қаршилаб қўйган “Қирол Казу” ҳали бери бутсиларини михга илиш ниятида эмас. У япон журналистлари билан суҳбатда ҳали яна 10 мавсум давомида футбол ўйнаш ниятида эканини маълум қилди.

- Менга футбол ўйнаш ёқади. Майдонга тушиб, тўп тепсам ҳузурланаман. Шу сабабли ҳам 60 ёшимга қадар фаолиятимни давом эттирмоқчиман, - деди Миура ҳазил аралаш.

Таъкидлаб ўтамиз, 1967 йилда туғилган япониялик футболчи ўз фаолиятини 1986 йилда “Сантос”да бошлаган. Диққатга сазовор жиҳати шундаки, Ўзбекистон миллий терма жамоасига қарши 4та учрашувда майдонга чиққан ушбу форвард термамиз дарвозасини 4 бор ишғол этишга муваффақ бўлган.