Бугун Осиё минтақасида ЖЧ-2018 саралашининг 2-босқичига якун ясалади ҳамда кейинги босқичга йўл олган 12та терма жамоанинг номи аниқ бўлади.

Ўзбекистон терма жамоасининг Баҳрайнга қарши ўйини 18:00да бошланади. Эътиборли томони, ушбу ўйин бошланмасиданоқ жамоамиз кейинги босқич масаласини ҳал қилиб улгуриши мумкин.

Муддатидан аввал кейинги босқич
"В" гуруҳидан ўрин олган Австралия-Иордания баҳси 14:00да бошланади. Унда меҳмонлар ғалаба қозона олишмаса ёки;

"Е" гуруҳи доирасида Япония ва Сурия ўртасидаги учрашувда кунчиқар мамлакат вакиллари ғалаба қозонишса, Ўзбекистонга сўнгги босқичга муддатидан аввал чиқиб бўлади.

Боиси, КХДР сафарда Филиппинни мағлуб этиб, Ўзбекистон ўз майдонида Баҳрайнга имкониятни бой берган тақдирда, жамоамиз ўз гуруҳида 2-ўринни эгаллайди ҳамда иккинчи ўринлилар жадвалида 12 очко жамғаради. Ҳозирги ҳолатда 3та гуруҳнинг 2-ўрнини эгаллайдиган жамоаси Ўзбекистондан ўтиб кетмаслиги аниқ бўлиб улгурган. Демак, яна бир гуруҳда 2-ўрин эгасининг сўнгги турда очко йўқотиши, Ўзбекистонни, Баҳрайнга қарши ўйинда қандай натижа қайд этишидан қатъи назар, кейинги босқичга олиб чиқади.

Юқоридаги иккита ўйин Тошкентдаги учрашувдан эртароқ бошлангани боис, Суриянинг мағлубияти ёки Иорданиянинг очко йўқотиши Ўзбекистонни бир неча соат аввалроқ сўнгги босқичга олиб чиқади.

Ёки...
Юқоридаги иккита шарт бажарилмаса, Тошкент вақти билан соат 17:00да бошланадиган Филиппин - КХДР ўйинида кореяликлар ғалаба қозона олмаса ҳам биз ўз гуруҳимизда 1-ўрин билан 3-босқич йўлланмасини қўлга киритиб бўламиз. Бу ўйин якунланган пайтда Ўзбекистон - Баҳрайн баҳсининг биринчи бўлими якунланган бўлади.

Бироқ...
Юқоридаги фикрлар шунчаки назария. Амалда эса Баҳрайнга қарши ўйинда бизга фақат ва фақат ғалаба керак:
- мухлисларга байрам қувончини улашиш учун;
- приниципиал рақибни мағлуб этиш учун;
- сўнгги босқич олдидан терма жамоаимизга бўлган ишонч йўқолмаслиги учун;
- ФИФА рейтингида кўтарилиш ва қуръа пайтида юқорироқ саватчада бўлиш учун.