Ўзбекистон миллий терма жамоаси ҳимоячиси Виталий Денисов ФИФА расмий сайти учун интервью берди.

Тажрибали ҳимоячининг таъкидлашича, агар Ўзбекистон терма жамоаси Жаҳон чемпионати йўлланмасини қўлга киритса, бу жаҳонда мамлакатимизни янада яхшироқ танитиш учун катта туртки бўлади.

- Сайёҳлик борасида мамлакатимизни бутун жаҳонда жуда яхши билишади. Бухоро, Хива, Самарқанд каби қадимий шаҳарларимизга бутун дунёдан кўплаб сайёҳлар ташриф буюришади. Аммо футбол бобида ҳали Ўзбекистонни унча яхши танишмайди. Лекин ўзимизга яраша мақтанишга арзийдиган жиҳатларимиз ҳам бор: Биз ҳам Осиёдаги гранд 4-5 термалар қаторига кирамиз. Ўсмирлар терма жамоамиз 2011 йили қитъа чемпионлигини қўлга киритди. “Бунёдкор”да Ривалдодек ўйинчи ўйнаганидан ҳам кўпчиликнинг хабари бор. Юртимизни янада яхшироқ танитиш учун балки Европа термалари билан ўртоқлик ўйинлари кўпроқ ўтказишимиз лозимдир. Лекин энг зўр реклама – бу Жаҳон чемпионатига чиқишдир.

Агар Жаҳон чемпионатига чиқсак, бу федерацияда ҳам, бутун мамлакатимизда ҳам кўп нарсани янада яхши томонга ўзгартиради. Ўйинчиларимизни бутун жаҳон яхшироқ таний бошлайди. Шунда янада кўпроқ одамлар Ўзбекистонга ташриф буюришни исташади. Аммо бунинг учун кўп ҳаракат қилишимиз лозим бўлади, - дейди маҳоратли футболчи ФИФА расмий сайтига.