Греция футбол федерацияси ФИФА ва УЕФАга аъзоликдан маҳрум қилиниши мумкин. Бу ҳақда Reuters хабар берган.
Хабарда айтилишича, мамлакат футбол федерацияси ишига ҳукумат томонидан аралашиш бўлаётгани бунга сабаб сифатида кўрсатилмоқда. Греция Кубоги доирасида ПАОК ва «Олимпиакос» жамоалари ўртасида кечган баҳс (1:2) давомида мухлислар ўртасида жанжал келиб чиққани туфайли ҳукумат Кубок баҳсларини тўхтатиб қўйишга қарор қилганди.
Учрашувнинг охирги қисмида ҳакам меҳмон жамоа «Олимпиакос» дарвозасига пенальти белгиламаган ва аксинча мезбон жамоа ПАОК футболчиси Роберт Макни майдондан четлатган. Шундан сўнг, мухлислар аввал майдонга петарда отганлар, сўнгра полиция билан муштлашув бошлаган. Натижада ўйин якунланмай қолган.
Греция ҳукумати эса Кубок ўйинлари қайта ўтказилмаслигини маълум қилди. УЕФА ва ФИФА бу қарорни бекор қилишни талаб қилди ва бу талаб бажарилмаса федерацияни четлатиш билан таҳдид этди.
Ҳозирча бу талаб бажарилмаган ва Греция УЕФА ва ФИФАга аъзолик ҳуқуқидан маҳрум этилиши мумкин.
ФИФАнинг бу масала бўйича делегацияси раҳбари Костакис Куцукумниснинг маълум қилишича, бу ўринда трибуналардаги тартибсизлик бўйича саволлар бор. У ўйинни бетараф майдонда ёки мухлисларсиз трибунада бўлсада ўтказиш мумкинлигини айтган. Унинг таъкидлашича, турнир албатта якунига етказилиши керак.
