«Арсенал» жамоаси бош мураббийи Арсен Венгер жамоанинг германиялик яримҳимоячиси Месут Ўзилнинг жорий мавсумдаги чемпионлик пойгасидаги муваффақиятсизлик ҳақида билдирган фикрларига муносабатини билдириб ўтди.

Бир неча кун олдин Месут Ўзил жамоа бош мураббийи Арсен Венгерни ёзги трансферлар пайтида фаол бўлишга чақирганди. У шунингдек, бу мавсумда жамоа футболчиларининг ўзлари ўзларини чемпионлик имконидан маҳрум қилишаётгани ҳақида айтиб ўтганди.

«Биз у билан бу ҳақда гаплашиб оламиз. У бундай гапларни сўзламаслиги керак эди.

Биз ўзимизга ишонишимиз керак. Имконият 100тадан битта бўлган тақдирда ҳам умидни йўқотмаслик керак. Имкониятлар ўзимизга ишонган тақдиримиздагина бўлади.

Энг қўрқинчлиси – ўзингга бўлган ишончни йўқотиб қўйишдир.

Биз охиригача эҳтирос билан ўйнашда давом этишимиз лозим. Мухлисларнинг ишончини сақлаб қолиш учун шундай қилишимиз керак», – дейди Венгер.

Бундан ташқари, Венгер раҳбарият Ўзил ва Алексис Санчес билан шартномани узайтириш устида ишлаётгани ҳақида айтиб ўтган.

Қайд этиш керакки, кейинги вақтларда лондонликлар жамоасининг бу етакчиларига Испания грандларидан қизиқиш борлиги ҳақида хабарлар тарқалганди.