"Барселона" клуби ҳимоячиси Жерар Пике Европа чемпионлар лигаси баҳслари доирасидаги Мадриднинг "Атлетико" клуби билан бўлиб ўтадиган ўйин эл-класикодан ҳам муҳим аҳамиятга эга эканлигини таъкидлаб ўтди.

"Сешанба кунги ўйин муҳим аҳамиятга эга. Биз руҳий ва жисмоний жиҳатдан ўйинга тайёрмиз. "Реал"га қарши ўйинда учралган мағлубиятдан кейин "Атлетико"га қарши ўйинда яхши ўйин намойиш этишимиз керак. Бизга ўйиннинг аҳамияти ҳақида эслатадиган будильниклар керакмас. Ўзимиз ҳам ўйинда ғалаба қозониш осон бўлмаслигини биламиз. Олдимизда қийин вазифа турибди. Биз бу мавсумда ҳам учта совринни ютмоқчимиз ва сешанба кунги баҳсда ғалаба қозонсак, ушбу мақсад сари бир қадам ташлаган бўламиз".

"Атлетико" билан ўйин эл-класикодан кўра қийинроқ бўлади. Бироқ ҳаммаси ўзимизга боғлиқ. Тўп билан тезкор муомала қилишни уддаласак, бизни тўхтата олишмайди. Гарчи биз ушбу жуфтликда фаворит деб кўрилаётган бўлсак-да, икки ўйин ҳам тенг курашлар остида ўтиши турган гап. Биз кўп марта "Атлетико"ни мағлуб этганмиз, бироқ навбатдаги ўйинда ҳам уларни мағлуб этиш йўлини топишимиз шарт. Эл-класикодаги ёмон натижадан кейин, ғалаба қозонишни истаяпмиз. Вазиятдан чиқиб кетишни ва яхши натижа қайд этишни хоҳлаяпмиз. Кўпроқ гол уришга ҳаракат қиламиз, бироқ биламизки, рақиб жуда хавфли. Класикони таҳлил қилиб олдик ва ундаги натижани аллақачон унутдик. Бор эътиборимиз Чемпионлар лигасидаги муваффақиятга қаратилган".

Эслатиб ўтамиз, "Барселона" клуби Чемпионлар лигасининг чорак финал баҳслари доирасида "Атлетико" жамоасига қарши 5 апрель куни баҳс олиб боради.