Осиё чемпионлар лигасининг 4-тури доирасида "Локомотив" эртага ўз майдонида Эроннинг "Сепоҳон" клубини қабул қилади. Бугун учрашуволди матбуот анжумани ташкил этилди. Унинг иккинчи қисмида "темирйўлчилар" бош мураббийи Андрей Микляев ва футболчи Сервер Жепаров иштирок этишди.

— Эртанги ўйин натижаси кейинги босқич масаласини ҳал қилишда катта аҳамиятга эга бўлади. Гуруҳдаги ҳолатимизни яхшилаб олиш учун ғалаба қозонишимиз керак. Яничични инобатга олмаганда, қолган ўйинчилар баҳсга тайёр. Яхши ўйин кўрсатиб, мухлисларни хурсанд қилишни мақсад қиляпмиз.

Сервер Жепаров: — Эртага яхши, сифатли ва мазмунли ўйин бўлади деб ўйлайман. Рақибимиз кучли жамоа. Биз ҳам яхши жамоа эканимизни сафардаги ўйинда кўрсата олдик. Эртанги ўйинда мухлисларни хушнуд қилиш мақсадида майдонга тушамиз.

— Рақиб сафидаги қайси футболчилардан хавф кутяпсиз?
— "Сепоҳон" ўйинини легионерлар ҳал қилади. Ҳимояда бразилиялик футболчи ўйнаса, марказда хорватиялик Ибричич ва Фозил Мусаев биргаликда ҳаракат қилишади, ҳужумда Чимбо ўйнайди. Ушбу ўйинчилар аҳамият беришимиз керак. Рақиб ўйинини ўрганиб чиқдик.

— Ислом Тўхтахўжаев жароҳатдан фориғ бўлдими?
— Эртанги ўйинда майдонга тушади деб умид қиламан. У кеча умумий машғулотдан қатнашди.

— "Сепоҳон" бош мураббийи дастлабки ўйинда ёмғирли ҳаво тактикага салбий таъсир кўрсатганини айтди. Эртага эса ёмғир ёғмаса, ўйиннинг янада қийин бўлишини кутиш мумкинми?
— Тахминларга кўра эртага ҳам ёмғир ёғиши кутилмоқда. Тўғри, улар ўз уйларида ўйнашди. Ҳужумкор ўйин учун сувли майдон халал берган бўлиши мумкин. Биз эса ёмғирни инобатга олган ҳолда тактика танлагандик. Боз устига, биз биринчи бўлиб гол уриб олдик. Ўйин сўнгида қарши ҳужумда яна гол уришга муваффақ бўлдик.

— Сервер, жамоа сафарда яхши ўйнаётганга ўхшайди. Бунга фикрингиз?
— Сизга шундай туюляпти. Аслида ундай эмас. Ўз уйимизда ҳам яхши ўйнашга ҳаракат қиламиз. Шунингдек, рақибга қараб тактика танланади.