“Бунёдкор” – “Зоб-Аҳан” учрашувидан кейинги матбуот анжуманининг биринчи қисмида “қалдирғочлар” устози иштирок этди.
- Бундай натижадан кейин ўйин ҳақида фикр билдириш осон эмас. Нима дейиш керак? Ҳозирги даврга чидамли бўлиш керак. Бугун деярли ҳимоя чизиғисиз ўйнадик. Ҳисоб таблода акс этиб турибди. Бу – футбол! Унда олдиндан ҳеч нима деб бўлмайди. Учрашувдан олдин албатта ижобий натижа ҳақида ўйлагандим. Яна қайтариб айтаман, бундай палладан ўтиб олиш керак. Ҳали олдинда яхши кунлар ҳам бўлади. Кейинги босқичга чиқиш учун деярли имкониятларимизни йўқотлик. Тўғри “Лаҳвия” билан кечадиган баҳсларнинг ҳар иккисида муваффақият қозона олсак нимчорак финалга йўл олишимиз мумкин. Лекин шунда ҳам тақдиримиз ўз қўлимизда бўлмайди. Ҳаёт давом этади. Синиб қолишимиз керак эмас. Бу мағлубиятни албатта таҳлил қиламиз, - дейди Сергей Лушчан.
