Вальтер Новеллино «Палермо» жамоаси бош мураббийлигидан кетгани ҳақидаги маълумотни тасдиқлади.
«Мен ўз лавозимимдан озод этилганимни маълум қиламан. Айтишим мумкинки, раҳбариятнинг бу қароридан жуда хафаман ва чуқур қайғудаман. Футболчиларга ва мухлисларга ўтган вақт давомидаги ҳамкорлик учун раҳмат», — дея Новеллинонинг сўзларини келтиради Football Italia.
Унинг «Лацио»га қарши 0:3 ҳисобидаги мағлубият билан якунланган ўйини «Палермо» бош мураббийлигидаги охирги ўйини бўлиб қолди. «Палермо» айни вақтда, 32 тур ўйинларидан кейин 28 очко тўплаган ҳолда турнир жадвалининг 18 ўринда турибди.
Қайд этиш керакки, Новеллино «Палермо» президенти Маурицио Дзампарини томонидан мавсум давомида ишдан бўшатилган саккизинчи мураббий бўлди. Жузеппе Якини 2 марта ишга тайинланиб, 2 марта бўшатилди. Давиде Баллардини билан ҳам шундай ҳолат кузатилди.
Сициялияликлар жамоасида мавсум давомида шунингдек, Фабио Вивиани, Гильермо Скелотто, Жованни Тедеско ва Жованни Боси каби мутахассислар ҳам бош мураббий сифатида ишлади. Улардан бири, Жованни Боси лавозимга тайинланганидан 5 кун ўтиб ишдан бўшатилди.
