Хитой ҳукумати томонидан футболни ривожлантириш бўйича тайёрланган режага кўра, мамлакат терма жамоаси 2050 йилда футбол бўйича Жаҳон чемпионати ғолиблигини қўлга киритиши лозим, деб хабар беради «ТАСС».

Хабар қилинишича, режани тайёрлашда Хитой футбол федерацияси, мамлакат Спорт ва таълим вазирлиги, шунингдек, Хитой раҳбари Си Цзиньпин иштирок этган.

«Хитой учта орзуни амалга ошириши керак: Жаҳон чемпионатини ташкил қилиш, унда иштирок этиш ва ниҳоят ғалаба қозониш», — деди Си Цзиньпин.

Ҳозирги кунга қадар Хитой терма жамоаси фақатгина 2002 йилда бўлиб ўтган Жаҳон чемпионатининг гуруҳ баҳсларида иштирок этган.

Режада қўйилган мақсадларга эришиш учун Хитой ҳукумати 50 миллионга яқин футболчи таҳсил оладиган 20 мингта футбол академиясини ташкил қилади.

Маълумот учун, Хитой терма жамоаси Осиё қитъасидан ЖЧ–2018 турнирига 2-саралаш баҳслари «C» гуруҳида иккинчи ўрин билан 3-саралаш босқичига йўл олди.

Футбол бўйича навбатдаги Жаҳон чемпионати 2018 йилнинг 14 июнидан 15 июлигача Россиянинг 11 шаҳри — Москва, Санкт-Петербург, Қозон, Сочи, Самара, Нижний Новгород, Ростов-Дон, Волгоград, Екатерингбург, Калининград ва Саранскда жойлашган 12 стадионда бўлиб ўтади.