Тарихдан жой олиш учун фақат ёрқин зарбалар ва нуфузли совринлар эмас, баъзан ноодатий, ғайри табиий ҳаракатлар ҳам кифоя қилади. Шунингдек, йирик омадсизликлар ҳам ўз соҳибларига абадийлик бахш этиши мумкин.
Кевин Пресманн («Шеффилд Уэнсдей»)
Мухлислар хотирасида чуқур из қолдириш учун Кевинда сабаблар етарли. Масалан, ҳатто дарвозабонлар учун ҳам ҳайрон қоладиган даражадаги девқомат гавдаси ёки «бўрилар»га қарши кечган учрашув (2000 йил август)нинг 13-сониясида (!) қизил карточка олишга улгуриши. Албатта, Прессман ҳеч қачон Дэвид Симан позициясига кўз олайтирган эмас. Лекин тан олиш керак, пенальтилар сериясида у кўпроқ манфаат келтириши мумкин эди.
Михаэль Райцигер («Мидлсбро»)
Голландия терма жамоаси ўйинчилари «Аякс», «Милан» ёки «Барселона»даги фаолиятларидан кейин албатта, «Мидлсбро» сафида тўп суришга интиладилар. Райцигер Стив Маклареннинг Будевейн Зенден, Патрик Клюйверт каби суюкли шогирдларидан эмасди. Аммо ўйин услуби Дани Миллс кетганидан кейин заифлашиб қолган жамоага жуда мос эди. Тўғри, мавсум бошланиши арафасида Михаэль жароҳат олиб, 2006 йили Голландияга қайтишга мажбур бўлди. Лекин «Боро»даги 26 учрашув давомида ажойиб таассурот қолдирди. Райцигердан эсдалик бўлиб қолган «Астон Вилла» дарвозасига урилган голни мухлислар ҳали ҳануз унутмаганлар.
Жорже Кошта («Чарльтон»)
17 йил давомидда «Порту» шарафини ҳимоя қилган сардорни бошқа жамоада ҳеч ким тасаввур қилолмасди. Аммо бош мураббий билан жанжаллашиб қолган Кошта ЖЧ-2002 арафасида спорт формасини йўқотмаслик мақсадида «Чарльтон» таклифини қабул қилди. Шу тариқа жамоада Янг-Фиш-Кошта-Форчун квартети вужудга келди. Лекин туманли ўлкада бардавом ўйнаш Жоржега насиб этмади - «Порту»га бош мураббий этиб тайинланган Жозе Моуриньо уни ортга қайтарди. Моу раҳбарлигида ЧЛ кубогини қўлга киритган Потугалия терма жамоаси собиқ ҳимоячиси ҳозирда Габон термасини бошқармоқда.
Бранко («Мидлсбро»)
1994 йили Бразилия термаси билан жаҳон чемпионлиги унвонига сазовор бўлган футболчи Англияда бурчак зарбаси билан дарвозани ишғол этиш орқали ёрқин таассурот қолдирганди. Бироқ кейинчалик ҳимоячи турли шубҳали ҳаракатларни намойиш эта бошлади. Охир-оқибат маишатпарастликка берилиб кетган Бранко майдонга кам тушадиган бўлиб қолди. 8 ойдан кейин эса жамоа билан хайрлашди.
Хосе Домингес («Тоттенхэм»)
160 сантиметрга тенг бўлган футболчи бўйи турли манбаларда ҳар хил қайд этилган. Хосе Англиядаги фаолиятини «Бирмингем»да бошлади. Бироқ жамоа бош мураббийи Барри Фрайнинг ишончини қозонолмай Португалияга қайтди. Лиссабонни «Спортинг»и «Барселона»га сотиб юборилган Луиш Фигу ўрнини у билан тўлдиришни мўлжаллаганди. Табиийки, Домингес ўз олдига қўйилган вазифани уддалай олмади ва яна туманли ўлкага йўл олди. Футболчи «Тоттенхэм» билан шартнома имзолади. «Тақачилар» сафида Давид Жинола Хосенинг яқин дўстига айланди. Ўз вилласи қурилишида ишлаган португалиялик қурувчилардан ўрганиб олган бир қатор иборалар ёрдамида франциялик футболчи Домингес билан тиллашиб, янги жамоадошини қўллаб-қувватлаб турди.
Андрес Д`Алессандро («Портсмут»)
Андрес 2006 йил январида «Портсмут» сафига қўшилгач, англияликлар уни «Янги Марадона» номи билан улуғлай бошлашди. 21 ёшда қадрдон жамоаси - «Ривер Плейт»да сардорлик даражасига кўтарилган футболчи фаолиятини Европада давом эттиришга қарор қилди ва Германияга йўл олди. Афсуски, у «Вольфсбург»да ўз ўрнини тополмади.
Англияда ҳам Андрес атиги битта гол урди. Аммо бу гол жуда қадрли бўлди - аргентиналик футбочлининг ана шу ягона аниқ зарбаси жамоани қуйи дивизионга тушиб кетишдан сақлаб қолди. Англияликлар Алессандро билан ҳамкорликни давом эттириш ниятида эдилар. Аммо у Испаниянинг «Сарагоса» клубида тўп суришни лозим топди. 2 йилдан сўнг Аргентинага қайтган Андрес ҳозирда жонажон «Ривер Плейт» сафида тўп сурмоқда.
Саша Чурчич («Болтон», «Астон Вилла», «Кристалл Пэлас»)
АПЛнинг суюкли футболчиси бўлиш учун қандай фазилатлар талаб этилса, Сашада бунинг барчаси мужассам эди: ўта жарангдор (сербиялик Жорж Бест) тахаллус, «Болтон» учун рекорд даражадаги трансфер қиймати...
Ёрқин юлдузга айланиши башорат қилинган футболчини харид қилган «Астон Вилла» бош мураббийи ундан самарали фойдаланиш йўлини тополмади ва мазкур келишувни ўз фаолиятидаги энг йирик хато сифатида эътироф этди. Бу орада сербиялик футболчи тунги клублар ва ичкиликка ружу қўйди. Натижада унинг савияси талабга жавоб бермайдиган ҳолга тушиб қолди. Ке йинчалик Чурчич АҚШда маълум муддат ўйнади, кейин Шотландиянинг «Мазервелл» клубига ўтди ва 29 ёшида ўз фаолиятига хотима қўйди.
Рикарду Куарежма («Челси»)
Куарежманинг ижараси ҳозирда ҳам «Челси» тарихидаги ажабтовур келишув бўлиб қолмоқда. 2009 йили «кўклар»нинг ўша пайтдаги бош мураббийи Луис Фелипе Сколари катта саъй-ҳаракатлар эвазига уни 4 ойга Лондонга олиб келганди. Бироқ Рикарду устози кутган ўйинни кўрсатолмади. «У кўп нарсани ўрганиши керак. Акс ҳолда, майдонга тушолмайди. Мана кўрасиз, у ўзининг техник ва тактик савиясини ошира олади. Яна 1-2 ойдан кейин сиз умуман бошқа Куарежмага дуч келасиз», - деганди Сколари ўрнини эгаллаган Моуриньо. Аммо афсуски, Рикарду учун чинакам юлдуз мақомига эришиш орзулигича қолиб кетди.
Вальтер Паниани («Бирмингем»)
«Мен Вальтерни танқид қилмайман. Ўтган мавсум у ишончли ўйинлари билан жамоага ёрдам берди. Қолаверса, мен уни Эмиль Хескига захира футболчиси сифатида харид қилгандим. Ваҳоланки, «фақат Хескининг захираси» туманли ўлкага Испаниядан ташриф буюрган ва дебютини 12-дақиқада гол уриш билан нишонлаганди. Бироқ кейинчалик Пандиани атиги 5та гол урди, холос. Лекин ана шу голлар қайси жамоалар билан бўлган ўйинларда амалга оширилгани эътиборга молик - 2таси «Ливерпуль», қолган 3таси - «Челси», «Арсенал» ва «МЮ»га!
Люк Нилис («Астон Вилла»)
Футболдаги кутилмаган фалокатнинг қурбони сифатида бельгиялик футболчини мисол қилиб кўрсатиш мумкин. 33 ёшли Люк сермаҳсул ҳужумчи сифатида танилган ва фаолиятини АПЛда якунлашга аҳд қилганди. Шу мақсадда Нилис 2000 йили эркин агент мақомида «Астон Вилла» сафига қўшилганди. Унинг АПЛдаги дебюти ҳам ўта муваффақиятли - «Челси» дарвозасини забт этиш билан бошланди. Бироқ «Ипсвич»га қарши баҳсда рақиб дарвозабони - Ричард Райт билан тўқнашиб кетган Люк ўта оғир жароҳат билан майдонни тарк этди. Шифокорлар унинг тиззаси 2 қисмидан синганлигини маълум қилгач, Нилис футбол билан хайрлашишга мажбур бўлди.
Footballhd.ru, Содиқ СОБИР тайёрлади
