Германиянинг «Бавария» жамоаси ҳимоячиси Меҳди Бенатиа Португалиянинг «Бенфика» клубига қарши ЕЧЛ чорак финал жавоб ўйинида майдонга туша олмайди. Марокашлик футболчи мушакларидаги муаммолардан фориғ бўлишига қарамай, Португалияга йўл олмади. Бу ҳақда, мюнхенликлар расмий сайтига таяниб, «Bigmir.net» хабар бермоқда.

Германиянинг Bild нашри эса Бенатианинг Мюнхенда қолиб кетганлиги сабабини аниқлади. Маълум бўлишича, марокашлик футболчи аэропортга келгач, паспортини уйида қолдириб кетганини тушуниб етди. «Бавария» мураббийлар штаби футболчини кутмасликка ва кейинги рейс билан уни Португалияга жўнатмасликка қарор қилди.

Жорий мавсумда 28 ёшли ҳимоячи «Бавария»нинг 15 ўйинида майдонга тушиб, 1 та гол ва 1 та голли узатмага муаллифлик қилди.

Эслатиб ўтамиз, «Бавария» Мюнхенда бўлиб ўтган ЕЧЛ чорак финал дастлабки ўйинида «Бенфика»ни 1:0 ҳисобида мағлубиятга учратган эди.