Англия Кубогида ярим финалнинг сўнгги иштирокчиси номи аниқ бўлди.

Чорак финалнинг 13 март куни бўлиб ўтган «Манчестер Юнайтед» — «Вест Ҳэм» ўйинида 1:1 ҳисоби қайд этилгач, томонлар регламентга кўра «Вест Ҳэм» майдонида жавоб ўйинида майдонга тушишлари керак эди. 13 апрель кунги такрорий ўйинда «Манчестер Юнайтед» 2:1 ҳисобида зафар қучиб, ярим финалнинг тўртинчи иштирокчисига айланди.

Қайд этиш керак, хорватиялик мутахассис Славен Билич бошчилик қилаётган «Вест Ҳэм»ни мавсум аввалида чемпионликка даъвогар дея қаралган «Манчестер Сити», «Челси», «Арсенал», «Ливерпуль» ва «Манчестер Юнайтед» клубларидан бирортаси мағлуб эта олмаганди. Бу ишни биринчи бўлиб, Луи Ван Гал жамоаси Англия Кубоги мусобақасида уддалади.

Бунга қадар, «Эвертон», «Уотфорд» ҳамда «Кристал Пэлас» клублари ярим финал чиптасини қўлга киритиб бўлганди. Финал остонасида «Юнайтед» ва «Эвертон» клублари биринчи жуфтликни ташкил қилади, иккинчи жуфтликда «Уотфорд» ҳамда «Кристал Пэлас» клублари тўқнаш келади.

Ярим финал беллашувлари Лондондаги «Уэмбли» стадиони бўлиб ўтади. Ўйинлар 23—24 апрель саналарига тайин қилинган.

Англия Кубоги
Чорак финал учрашуви
13 апрель, чоршанба
«Вест Ҳэм» — «Манчестер Юнайтед» 1:2
Голлар: Маркус Рашфорд, 54 (0:1). Маруан Феллайни, 67 (0:2). Жеймс Томкинс, 79 (1:2).
«Вест Ҳэм»: Даррен Рэндольф, Аарон Крессвел, Жеймс Томкинс, Анжело Огбонна, Майкл Антонио, Марк Ноубл, Шейку Куйяте, Мануэль Лансини (Эммануэль Эменике, 74), Димитри Пайет, Эннер Валенсия (Виктор Мозес, 62), Энди Кэрролл.
«Манчестер Юнайтед»: Давид де Хеа, Маркос Рохо (Антонио Валенсия, 68), Крис Смоллинг, Тимоти Фосу-Менса, Майкл Керрик, Дейли Блинд, Жесси Лингард, Маруан Феллайни, Андер Эррера (Морган Шнейдерлен, 76), Маркус Рашфорд (Уэйн Руни, 90), Антони Марсьяль.