"Локомотив" - "Машъал" учрашувидан кейин матбуот анжумани ўтказилди. Унда дастлаб меҳмонлар бош мураббийи Александр Хомяков иштирок этди.

"Натижа — ҳаққоний. "Локомотив" бизга қараганда яхшироқ ўйнади. "Локомотив"ни ғалаба билан табриклайман. Одатда мен ўз футболчиларимни матбуот орқали танқид қилмайман. Маҳорати кам футболчилар ўзининг иштиёқи орқали рақиб билан тенгма-тенг ўйнашга ҳаракат қилади. Биринчи бўлимга тузган режамиз охиригача иш бермади. Керак бўлмаган жойда гол ўтказиб юбордик. Кетма-кет ўтказиб юборилган голлардан кейин шогирдларимда иштиёқ йўқолиб қолди.

Ушбу мавсумда комбинацион ва ҳужумкор ўйин қилишни, майдоннинг рақиб томонида прессинг қўллашни режалаштиргандик. Шу мақсад йўлида тайёргарлик олиб боргандик. Дастлабки ўйинлар кўрсатдики, биз ҳали бундай ўйинга тайёр эмасмиз. "Қизилқум" ва "Металлург"га қарши ўйинларда ҳисобда олдинда бораётиб, якунда мағлуб бўлдик. Шунинг учун ўз ўйинимизни ўзгартиришга қарор қилдик. "Бунёдкор" билан ёпиқ ўйин намойиш қилдик ва бу бизга очко келтирдик. Бугун эса режамиз амалга ошмади. Биз марказни ёпа олдик, аммо рақибга қанотларда имкониятни бой бердик. Ўтказиб юборилган голдан кейин очилишга мажбур бўлдик. "Локомотив" билан очиқ ўйин қилиш мағлубият билан тенг", — дейди Хомяков.