Кеча Олий Лига 5-тур учрашувлари доирасида ўтган “Бунёдкор” - “Олмалиқ”қарама-қаршилигида 4:2 ҳисоби қайд этилди ва “қалдирғочлар” олмалиқлик футболчилар устидан чиройли ғалабага эришишди.

Баҳс якунлангач, ҳар икки жамоа футболчилари журналистлар учун ажратилган микст ҳудудда ўйин борасидаги фикрларини билдириб ўтишди. Хусусан, “Олмалиқ” жамоаси сафида гол киритишга муваффақ бўлган ҳужумчи Фарҳод Тожиевнинг айтишича, “Олмалиқ” жамоаси бу йил негадир кўнгилдагидек ўйнай олмаяпти.

- Учрашув жуда қийин тарзда ўтганини таъкидлай оламан. Сабаби “Бунёдкор” жуда кучли жамоа. Ушбу клуб уйда фақат ва фақат ғалаба учун ўйнаши барчага бирдек маълум. Аммо биз ҳам бу ўйинда ғалаба қозонишни ният қилгандик. Лекин ўйлаган режаларимиз иш бермади. Айниқса, ҳимояда ўйинимиз чиқмади. Йигитлар қўлдан келганча ҳаракат қилишди, аммо омад рақибга кулиб боқди.

Голим борасида нима дея оламан? Гол киритиш – ёқимли, албатта. Лекин сен киритган гол жамоангга ғалаба олиб келмаса – ундан ортиқча қувонмайсан…

Ўзи бу йил “Олмалиқ”нинг ўйини ўзимиз истагандек чиқмаяпти. Мавсум аввалида “Бухоро” билан сафарда ўйнадик. Кейинги ўйинларда ҳам шундай омадсизлик давом этмоқда. Умид қиламанки, тез орада яна ғалабалар қўлга кирита бошлаймиз.

Олдинда энди бизни “Навбаҳор”га қарши баҳс кутиб турибди. Бу ўйин ҳам осон ўтмаслиги табиий. Лекин биз Намангандан ғалаба билан қайтишга ҳаракат қиламиз, - дейди тажрибали ҳужумчи SPORTS.uz интернет-портали мухбирига.