Швейцария ҳукумати Халқаро футбол федерацияси (ФИФА) собиқ президенти Йозеф Блаттердан Бурунди президенти Пьер Нкурунзизани амалидан туширишда ёрдам сўраган. Бу ҳақда Блаттер ўз китобида маълум қилди, деб ёзади «ТАСС».

Китобдан парча Keirradnedge.com порталида келтирилди. 80 ёшли Блаттернинг китоби 21 апрель куни Цюрихда тақдим этилади.

Китоб матнида айтилишича, Швейцария ташқи ишлар департаменти АҚШ кўмагида Блаттерга мурожаат қилган, чунки у мамлакат ичида Лидия Нсекеру (ФИФА ижроия қўмитасининг биринчи аёл аъзоси) орқали катта таъсирга эга бўлган. Нкурунзиза 2005 йилда Бурунди президентига айланган, 2010 йилда эса янги муддатга қайта сайланган. Мамлакат қонунлари президентга ўз лавозимида кетма-кет икки муддатдан узоқроқ қолишга рухсат бермайди, аммо ўтган йили у сайловларда яна ўз номзодини илгари сурди ва катта фарқ билан ғалаба қозонди.

Бунинг натижасида халқаро ҳамжамият мамлакат ҳудудида қуролли тўқнашувлар давом этишидан хавфсиради, бунинг устига, Нкурунзиза Бурунди ҳудудига БМТ тинчликпарвар кучларини жойлаштиришдан бош тортган эди.

Натижада Швейцария ҳукумати ва АҚШ Блаттерга мурожаат қилиб, Нкуринзизани сиёсий ишлардан чалғитиш учун унга ФИФА тузилмасидаги лавозимлардан бирини таклиф қилишни сўради. Бироқ ушбу режа номаълум сабабларга кўра, амалга ошмай қолди.