Умумий олганда, ОЧЛ гуруҳ босқичининг 4-тури клубларимизга омадсиз келди.

Бироқ бундан тушкунликка берилмаслик керак. Зеро, олдинда ҳал қилувчи ўйинлар турибди. Ҳозирги ҳолатга қарасак, «Локомотив»нинг «плей-офф»га чиқиш имконияти зўр. Бироқ бутун футболимиз учун биргина «Локо» камлик қилади. Бас, шундай экан, «Насаф» ва «Пахтакор» қолаверса, «Бунёдкор» ҳам 5-6-тур баҳсларига фақат яхши ният билан қараши зарур. Тўғри, «Бунёдкор»нинг имконияти ҳаминқадар. Лекин жамоа ҳар қандай ҳолатда мухлислар учун ўйнаши лозим. Ахир «қалдирғочлар»нинг ОЧЛнинг асосий ўйинларида ғалаба тақдим этишганига ҳам анча бўлди. «Насаф»нинг тақдири эса ўз қўлида: қаршиликлар «Ал-Айн» билан ўзаро қарама-қаршиликда устунлик қилишса, бас. «Пахтакор»га келсак, «шерлар»нинг «Тракторсози» ва «Ал-Ҳилол» ўртасидаги учрашувлар натижаларини кутишларига тўғри келади. Шахсий фикримча, С. Арабистони ва Эрон клублари ҳозирги ҳолатда сира муроса қилишмайди. Демак, «шерлар» ҳам «Жазира»дан 6 очко олишга уриниб кўришлари шарт.

Козим ДЕҲҚОНОВ, Чирчиқ шаҳри.