“Қўқон-1912” – “Қизилқум” учрашувидан кейин ўтказилган матбуот анжуманининг биринчи қисмида “Қизилқум” жамоаси бош менежери Ҳамиджон Актамов иштирок этди.
–Аввало ассалому алайкум, бугунги баҳсга жиддий тайёргарлик кўргандик. Рақибни яхши ўрганиб чиққандик. Бугунги учрашув қийин бўлишини билардик. Қўқонликлар билан қишда ҳам ўйнагандик. Ўша баҳсни таҳлил қилдик. Шу асосида ўйинни ташкил этдик. Ҳар икки жамоага ҳам очко сув ва ҳаводек зарур эди. Бугун омад бизга кулиб боқди. Шогирдларимга ғалаба учун миннатдорчилик билдирмоқчиман.
Бугун ҳужумкор ўйин намойиш этишни режалаштирмагандик. Шу боис ҳимояга таянган ҳолда ҳаракат қилдик. Кези келганда, “Марказий” ўйингоҳга ташриф буюрган мухлисларга ҳам раҳмат айтмоқчиман.