Ўйиндан кейинги матбуот анжуманида ҳар икки жамоа вакиллари ўйин ҳақида фикрларини билдириб ўтишди. Меҳмонлар мураббийи фикри билан танишинг.
Шавкат САИДОВ ("Металлург" жамоаси бошлиғи): - Биринчи бўлимда ҳимояда тартибли ўйнадик. Ҳужумда эса техник хатоларга йўл қўйдик. Дастлабки 45 дақиқа ичида голли вазиятлар ярата олмадик. Танаффусдан сўнг ҳужумда тезкорлик пайдо бўлди. Ҳимояда эса икки вазиятда Сергеев ва Каримовни бўш қолдирдик, бу бизга панд берди. Шу боис бугун уч очкони қўлдан бой бердик. "Пахтакор" жамоасининг бир нечта ўйинларини кузатгандик. Сергеев, Машарипов, Каримов сингари футболчиларни қанчалик хавфли эканлигини билардик. Аммо Каримовнинг голи вақтида ҳимоячимиз ўз футболчисини ёпишга кеч қолди.
