“Локомотив” – “Олмалиқ” жамоалари ўртасидаги беллашув якунлангач, ҳар икки жамоа устозлари иштирокида матбуот анжумани ташкил этилди. Унинг иккинчи қисмида “темирйўлчилар” бош мураббийи Андрей Микляев журналистларнинг саволларига жавоб қайтарди.

- Бугунги ўйин яхши ўтди, дея оламан. Қайд этилган натижадан қониқиш хосил қилдим. Аслида бир қатор ёшларни кўздан кечириб олишни мўлжаллагандик. Улар ёмон ҳаракат қилишмади.

Бугун айниқса, тезкор тарзда гол кирита олганимиз ҳам бизга наф берди. Энди олдинда бизни янада масъулиятли ўйин кутиб турибди. Умид қиламанки, Чемпионлар лигаси доирасидаги ўйинда Темурхўжа Абдухолиқов майдонга туша олади. Унда кичик жароҳат бор эди. Шу сабабли ҳам бу футболчини майдонга туширишни лозим топмадик.

Биласизми, айни пайтда бизнинг олдинги чизиғимизда муаммолар бор. Боиси ҳужумда рақобат олдингидек кучли эмас.

Яна бир янгиликни айта оламанки, Бобур Йўлдашев даволаниб қайтди ва у тез орада сафимизга қўшилади. Бу футболчига катта умид боғлаганмиз. Яқин вақт ичида жамоамиз оптимал формада ўйин кўрсата бошлайди, - дейди тажрибали мураббий.