Ҳозиргина Қатар кубоги финалига якунига етди. Унда Сардор Рашидов шарафини ҳимоя қилаётган "Ал-Жаиш" клуби "Лахвия"га қарши баҳс олиб борди.

Ҳамюртимиз учрашувни бошланғич таркибда бошлаганини таъкидлаш лозим. Ўйиннинг 31-дақиқасида Муҳаммад Метнаний духайлликларни ҳисобда олдинга олиб чиқди. Баҳснинг 65-дақиқасида эса Сардор Рашидов ўз ўрнини Ёсир Абу Бакрга бўшатиб берди. Орадан кўп ўтмасдан "Лахвия" ҳисобни тенглаштирди. Калуйитука пенальтини аниқ амалга оширди.

Ўйин қўшимча бўлимларга кўчиши кутилаётганда "Жаиш" пенальти тепиш ҳуқуқини қўлга киритди. Жамоа тўпурари Абдулраззоқ Ҳамидуллоҳ 11 метрли зарбани аниқ амалга ошириб, жамоасига Қатар кубогини келтирди.

Шу тариқа, Сардор Рашидов ўзининг "Ал-Жаиш"даги илк мавсумида Қатар Юлдузлар лигасининг кумуш медалини ва Қатар кубогини қўлга киритди. Шунингдек, "Ал-Жаиш" ОЧЛда муваффақиятли иштирок этиб, муддатидан аввал нимчорак финалга чиқди. Плей-оффда жамоа айнан "Лахвия"га қарши баҳс олиб боради.