Жорий мавсумдаёқ Олий Лигага қайтишни мақсад қилган «Динамо» жамоаси ҳозирда Биринчи Лигада ўйинларида асосий эътиборини маҳаллий ёш футболчилар эвазига таркибни шакллантиришга қаратган.
Шу мақсадда Самарқанд вилоят футбол федерацияси ва «Динамо» клуби ҳамкорлигида сўнгги бир ҳафта давомида вилоятдаги мавжуд футбол мактабларидаги 1998, 1999 ва 2000-йилларда туғилган 200га яқин ёш футболчилар ўртасида турнир ташкил этилиб, улар орасидан энг иқтидорлари Самарқанд вилоят терма жамоаси сифатида саралаб олинди.
Вилоят футбол федерацияси ва «Динамо» клуби шофелигидаги ушбу мусобақанинг финал қисми 1 май, якшанба куни «Динамо» ўйингоҳида ўтади. Унда «Динамо» клуби ёшлари ва ёш футболчилардан сараланган Самарқанд вилоят терма жамоаси ўзаро майдонга тушишади. Ушбу баҳсда «Динамо» клуби мураббийлар штаби, Самарқанд футболи жамоатчилиги вакиллари иштирок этади. Мураббийлар томонидан сараланган иқтидорли ёш футболчиларни кейинчалик «Динамо» жамоаси йиғинларигига таклиф этиш, уларга бўлган эътиборни кучайтиш мақсад қилинган.
«Вилоят футбол федерацияси ва «Динамо» клуби ҳамкорлигида мана шундай доимий селекция ишларини йўлга қўйиб, иқтидорли ёш футболчиларни тўлиқ назорат қилишни кўзлаганмиз. Бу жараён доимий тарзда олиб борилиб, келажакда маҳаллий ёшларимизнинг клубларимиз сафидан ўрин олишини, терма жамоаларимизга номзод футболчи сифатида вояга етишларинини таъминлайди» - дейди Самарқанд вилоят футбол федерацияси вице-президенти Шуҳрат Сайфуллаев.
Эслатиб ўтамиз, «Динамо» ва Самарқанд вилоят терма жамоаси ўртасидаги ушбу баҳс 1 май куни соат 11:00да «Динамо» ўйингоҳида бошланади. Ушбу учрашувга мухлисларни таклиф этиб қоламиз.
