Тошкентнинг «Локомотив» клуби Осиё Чемпионлар Лигасининг 2016 йилги мавсуми гуруҳ босқичини мағлубиятсиз якунлаб, «Бунёдкор»нинг 2013 йилги натижасини такрорлади.

«Темирйўлчилар» ўз тарихида биринчи бор ОЧЛ гуруҳ босқичини муваффақиятли якунлаш учун, 2 та ўйинда зафар қучиб, яна 4 тасида дуранг ўйнади. 2013 йилги мавсумда Миржалол Қосимов мураббийлигидаги «Бунёдкор» ҳам худди шундай кўрсаткич қайд этган.

Қизиқ томони шундаки, «Бунёдкор» ва «Локомотив»нинг ОЧЛ гуруҳ босқичини мағлубиятсиз якунлаган мавсумларидаги тўплар нисбати бир хил — 6:3.

2013 йилги мавсумда «Бунёдкор» ОЧЛнинг гуруҳ босқичини Шарқий минтақада ўтказиб, Хитойнинг «Бейцзинг Гоан», Жанубий Кореянинг «Поҳанг Стилерз» ва Япониянинг «Санфречче Хиросима» клубларига рақиб бўлганди.

Миржалол Қосимов жамоаси гуруҳдаги ҳар икки ғалабани сафарда, 2 та жамоа устидан қўлга киритган (Япония ва Хитойда). «Локомотив»нинг ҳар икки ғалабаси эса 1 та клуб устидан қўлга киритилди. Ўзбекистонлик футболчи Фозил Мусаев ҳаракат қиладиган Эроннинг «Сепаҳон» клуби ОЧЛ гуруҳ босқичида «Локомотив»дан икки бор енгилди.