Хабарингиз бор, кеча Тошкентнинг “Локомотив” жамоаси Осиё Чемпионлар Лигаси гуруҳ босқичи 6-тур учрашувлари доирасида БААнинг “Ал Наср” клубига қарши баҳс юритди.
Мазкур ўйин якунлангач, ҳар икки жамоа футболчилари ОАВ вакиллари учун ажратилган микст-ҳудудда матч борасидаги фикрларини билдириб ўтишди. Хусусан, “темирйўлчилар” етакчиларидан бири Сардор Мирзаев қуйидагиларни таъкидлади:
- Учрашув биз учун ҳам, рақиб учун ҳам осон ўтмади. Ўйин бироз томошабоп кўриниш олмаганини сабаби – ҳар икки жамоа ҳам гол ўтказиб юборишни истамади. Натижада эса ҳимояга асосланган ўйин услуби танланди. Аммо якунда қайд этилган натижа – қониқарли бўлди, деб ўйлайман. Сабаби биз орзиқиб кутилган натижага эриша олдик – гуруҳдан чиқиш вазифасини уддаладик. Менимча, бундан жамоамиз ишқибозлари жуда ҳам хурсанд.
Энди олдинда бизни дастлаб “Обод”, сўнгра “Пахтакор”га қарши жуда масъулиятли ўйинлар кутмоқда. Ҳозир бор эътиборимизни шу икки ўйинга қаратамиз. Кейин эса ОЧЛ 1/16 финали ҳақида бош қотирамиз.
Шуни таъкидлай оламанки, Осиё Чемпионлар Лигасида имкон қадар узоқроққа боришга ва мамлакатимиз шарафини муносиб тарзда ҳимоя қилишга ҳаракат қиламиз. Чунки Ўзбекистонга кейинги мавсумлар учун бериладиган квоталар сони биз қайд этадиган натижага ҳам боғлиқ эканини, жуда яхши англаб турибмиз. Умид қиламанки, “Локомотив” Осиё майдонларида бундан кейин ҳам муносиб ўйин кўрсата олади, - дейди маҳоратли ярим ҳимоячи SPORTS.uz интернет-портали мухбирига.
Таъкидлаб ўтамиз, “Локомотив” 1/16 финал доирасида “Ал Ҳилол”га қарши баҳс олиб боради. 
