DIS инвестицион фондининг ижрочи директори Роберто Морено "Барселона" ҳужумчиси Неймарни қаттиқ танқид остига олди.
Морено бразилиялик футболчи, "Барселона" клуби ва "Сантос" клубларига қарши судда кўрсатма бериш учун Мадридга келди. DIS Неймар ва бу икки клубни фирибгарлик ва коррупцияда айбламоқда.
"Нима учун Неймарни судга бердик? Чунки биз ўзимизни алданган ҳисоблаяпмиз. Неймар келажаги порлоқ ўсмир чоғида биз катта таваккал қилиб унга ғамхўрлик қилганмиз, унга кўп миқдорда пулларни инвестиция қилганмиз. Аммо у бизларни сотди. Неймар ёшларимиз учун намуна бўла олмайди, у бизларни алдади. Суд унинг фирибгарлик, коррупция ва солиқ тўламаслик ишлари бўйича ишини кўрмоқда", - дейди Морено.
