Фарғонанинг “Нефтчи” жамоаси 8-тур доирасидаги “Олмалиқ”қа қарши беллашувга қизғин ҳозирлик кўрмоқда. Мураббийлар штаби қарорига кўра, 5 май куни Қиргулидаги қароргоҳда бўлиб ўтган машғулотларда асосий ва ёшлар таркиби биргаликда шуғулланишди. Бу ҳам асосий ва ёшлар таркиби ўртасидаги узвий уйғунликдан далолатдир. Умумий гуруҳдаги машғулот жараёнига Алексей Естафеев, Абдусамад Дўрмонов, Баҳром Ҳайдаров, Диёр Алижонов ҳамда Рустам Абдуллаевлар бошчилик қилишди. Баходир Шамсиддинов эса доимгидек дарвозабонлар Абдумавлон Абдужалилов ҳамда Ўткир Юсупов билан ишлади. Маълум сабабларга кўра, бош мураббий Андрей Фёдоров жараённи фақат кузатиш билан чекланди. Машғулотнинг иккинчи қисмида асосий ва ёшлар таркиби 2 гуруҳга бўлинган ҳолда кичик ўйин ўтказишди. Яқинда Ўзбекистон ёшлар терма жамоаси йиғинида бўлган Абдуқодир Ортиқов ҳам жамоа ихтиёрига етиб келди.
Эслатиб ўтамиз, шанба куни Ёшлар лигаси доирасида Баҳром Ҳайдаров устозлигидаги “Нефтчи” ўринбосарлари олмалиқлик рақибларига қарши ўйнашади. Эртасига эса асосий жамоамиз турни ўтказади.
“Нефтчи” матбуот хизмати
