Қаршининг “Насаф” жамоасида фаолият юритиб, жамоа ютуқларига муносиб ҳисса қўшган, тажрибали ҳимоячи Ҳамза Каримовни воҳалик футбол ишқибозлари яхши билишади. Ҳамза Каримов бу йилги мавсумдан Навоийнинг “Қизилқум” жамоаси сафида фаолият олиб бормоқда.

Биз яқинда Ҳамза Каримовнинг жароҳатидан қутулиб, яна сафга қайтиши ҳақида эшитиб, тўғриси хурсанд бўлдик. Ҳар ҳолда Ҳамзанинг воҳамиз клубларидаги фаолияти, воҳалик футбол ишқибозларининг доимо эътирофида бўлган.

Бугун интернет нашрларида эълон қилинган хабарларда шу нарса тушуниладики, гўёки Ҳамза Каримов “Насаф”дан хафа бўлиб, бошқа клубга ўтиб кетган. Гўёки, клуб унга ҳеч қандай ёрдам бермаган.

Аммо бизда бундан бошқачароқ маълумотлар борлиги, аниқроғи Ҳамза Каримов жамоа бош мураббийи Рўзиқул Бердиевга “ўзи ўрнига бошқа ўйинчи қидиришини, энди у жамоага бошқа ёрдам қила олмаслигини”, — айтган. Бизнингча, бу футболчининг ақлли ва тўғри қарори бўлган. Чунки, жамоада ўйинчиларга қўйиладиган талабларни у яхши билган.

Биз шу ҳақда янада аниқлик киритиш учун,  Ҳамза Каримовнинг ўзига мурожаат қилдик.

— Менинг “Насаф”дан кетишимга ҳеч қандай хафачилик ёки норозичилик сабаб бўлмаган. “Насаф”даги фаолиятим, футболчилик фаолиятимдаги энг яхши давр бўлди, - дейди Ҳамза Каримов.

Биз яна шуни аниқ биламизки, “Насаф” клуби ҳеч бир ўйинчини ҳеч қачон оғир аҳволга ташлаб қўйган эмас.  Бизнингча, бундан кейин ҳам шундай бўлади.

Аммо бизни таажубга солган ҳолат шуки, “Насаф” клуби  билан собиқ ўйинчи ўртасида сунъий “келишмовчилик”ни ўйлаб топиш,  кимга наф-у, кимга зарарлигини тушунмадик. Шу нарса аниқки, “туз еб, тузлиққа тупуриш” – ақли расо кишиларга ёддир. Ёки ўзини “меҳрибон” қилиб кўрсатиш, обру олиб келадими?..  

Ренат Эрназаров