Тошкентнинг “Бунёдкор” жамоаси 9 май куни водийда “Қўқон-1912” клуби меҳмони бўлади.
Ушбу учрашув бу икки жамоаларнинг ўзаро ҳисобдаги учинчи қарама-қаршилиги бўлади. Бунгача ўтказилган иккита баҳсда “қалдирғочлар”нинг қўллари баланд келган. 2015 йилги чемпионат доирасида Қўқонда кечган баҳсда Достонбек Ҳамдамовнинг ягона голи бунёдкорчиларга ғалаба келтирганди. Тошкентдаги жавоб учрашувида эса “Бунёдкор” йирик – 5:0 ҳисобида зафар қучган. Голларга Виктор Карпенко, Минори Сато, Достонбек Ҳамдамов ва Воҳид Шодиев (2та) муаллифлик қилишган.
ЎзПФЛ 9 май куни бўлиб ўтадиган “Қўқон-1912” – “Бунёдкор” учрашувига Равшан Эрматов бошчилигидаги элит ҳакамлар гуруҳини тайинлади.
Жамоалар таркибларида ҳеч қандай йўқотишлар йўқ. “Қўқон-1912”нинг ҳам, “Бунёдкор”нинг ҳам барча футболчилари дисквалификация туфайли ўйинни ўтказиб юборишмайди.
Эслатиб ўтамиз, 8-тур доирасидаги “Қўқон-1912” – “Бунёдкор” учрашуви 9 май куни Қўқондаги “Марказий” стадионда соат 17:00да бошланади.
Қуйидаги ҳавола орқали “Қўқон-1912” ва “Бунёдкор” жамоаларининг бунгача ўтказган ўзаро ўйинларида киритилган голларни томоша қилишингиз мумкин.