Иккинчи жаҳон урушида ўзининг навқирон ёшлигини жангоҳларда, уруш оловларида ўтказган боболаримизнинг, у ерларда жонини фидо қилган қаҳрамонларимизнинг хотирасини ҳурмат қилиш – биз авлодларнинг бурчимиздир.
Шунингдек уруш ортида кечани кеча демай, кундузни кундуз демай, оч-наҳор тинмасдан меҳнат қилган боболаримиз ва момоларимизнинг жасорати ва қаҳрамонлиги доимо хотиримизда. Ҳозирги пайтда мустақил Ватанимизда қарилик гаштини сўраётган бундай ҳурматли инсонларни қадрлаш эса, инсонийлик бурчимиздир.
9-май хотира ва қадрлаш куни муносабати билан “Насаф” ПФК раҳбарияти ташаббусига кўра, шундай инсонларни йўқлаш, уларга ҳурмат бажо келтириш, қадрлаш анъанага айланиб қолган.
Бугун “Насаф” ПФК вакиллари ва бир гуруҳ футболчилар, Қарши шаҳрида истиқомат қилаётган ва иккинчи жаҳон уруши қатнашчилари хонадонига ташриф буюришиб, уларга чуқур ҳурмат бажо келтириишди.
Шундай қадрли инсонларимиздан бири – Рашид бобо Умидовдир. У киши иккинчи жаҳон урушини Прагада ниҳоялаб, ўз она юртига қайтиб келганлар. Ҳозирги пайтда мустақил юртимизда қарилик гаштини сурмоқдалар. Вакилларимиз у кишига чуқур ҳурмат бажо келтиришди ва совға-саломлар топширишди.
