"Машъал" 8 май куни Олий Лиганинг 8-тур баҳсини "Андижон"га қарши ўтказди. Бу ўйинни асосий таркибда бошлаган футболчи Шоҳжаҳон Қиличев шу куни Олий Лигада дастлабки ўйининида майдонга тушди. 20 ёшли ҳимоячи бу баҳсда 70 дақиқа ҳаракат қилди.
Эслатиб ўтиш керакки, Қиличев 17 ёшгача бўлган ўсмирлар ўртасида Осиё чемпиони ҳисобланади. “Машъал” клуби матбуот хизмати эса ушбу футболчининг ўйин борасидаги фикрларини тақдим этди.
- Дебют ўйинимда бундай натижа бўлишини кутмаган эдим. "Андижон"га қарши жуда ҳам қийин ўйин бўлди. Ўйинимга мураббийлар баҳо беради. Энг аввало айтиб ўтишим керакки, менга ишонч билдириб асосий таркибга қўйгани учун Александр Хомяковга миннатдорчилик билдираман. Бу мураббийдан кўп нарсани ўрганмоқдаман. Кейинги ўйинларда менга билдирилган ишончни тўла оқлаш учун майдонга тушаман, - дейди Қиличев.
