1news.uz — Ўзбекистон Миллий Олимпия терма жамоаси жорий йилнинг 5-21 август кунлари Бразилиянинг Рио-де-Жанейро шаҳрида ўтказиладиган XXXI ёзги Олимпиада ўйинларида медаллар сони бўйича аввалги натижаларни ортда қолдиради.
Бу ҳақда “Спорт” телеканалига интервью чоғида Ўзбекистон Миллий Олимпия қўмитаси президенти Мираброр Усмонов маълум қилди.
Унинг айтишича, ҳозиргача ўзбекистонлик олимпиячилар 77 та Рио (айни дамда – 79 та – 1news.uz) йўлланмаларини қўлга киритишган.
“Ўзбекистонлик спортчилар XXXI ёзги Олимпиада ўйинларига жами 100 га яқин йўлланмаларни қўлга киритиши кутилмоқда. Муҳими, бўлажак Олимпия ўйинларида спортчиларимиз медаллар сони бўйича аввалги натижаларимизни ортда қолдиришига етарли асосларимиз бор”, – деди Мираброр Усмонов.
Ўзбекистон Миллий Олимпия қўмитаси раҳбарининг фикрича, 2019 йилга келиб, юртимизда ҳар қандай спорт йўналишлари бўйича жаҳон чемпионатларини ўтказишга етарли шарт-шароит яратилади.
“Ҳозир ҳам турли спорт турлари бўйича жаҳон чемпионатларини ўтказишга қудратимиз етади, аммо жойларда айни пайтда шундай спорт иншоотлари қурилиши мўлжалланганки, 2019 йилга келиб Ўзбекистон ҳар қандай жаҳон чемпионатларини бемалол ўтказа оладиган бўлади”, – ишонч билдирди сенатор Усмонов.
Шуни таъкидлаш лозимки, Ўзбекистон спортчилари Олимпия ўйинларида шу кунгача жами 21 та медал (6 та олтин, 5 та кумуш, 10 та бронза)ни қўлга киритишган.
