Россиянинг «Локомотив» ва «Ростов» клублари собиқ ярим ҳимоячиси, айни дамда MLS лигасининг «Чикаго Файр» жамоасида тўп сураётган руминиялик футболчи Резван Кошич «Ванкувер Уайткепс»га қарши учрашувда рақиб ҳужумчиси Масато Кудонинг жонини сақлаб қолишда бевосита иштирок этди, деб хабар беради «Чемпионат».

Учрашувнинг 11-дақиқасида тўпга катта тезликда югуриб чиққан «Чикаго Файр» дарвозабони Масато Кудога тирсаги билан кучли зарба берди. Тўқнашув натижасида ҳужумчи ҳушини йўқотди ва унинг тили ортга кетиб қолди. Биринчилардан бўлиб ёрдамга «Чикаго» аъзолари Жоау Мейра ва Резван Кочиш етиб келди.

Кочиш япониялик ҳужумчининг ортга кетиб қолган тилини қайтариб, унинг нафасини тиклашга муваффақ бўлди. Шундан сўнг тиббиёт ходимлари Масатонинг жонини сақлаб қолиш учун керакли муолажани ўтказди.

«Жоау Масатони ёнбошига ётқизиб, фавқулодда ўринли қарор қабул қилди, чунки унинг оғиз бўшлиғидан кўп қон чиқаётганди. Мен эса унинг ортга кетиб қолган тилини қайтариб, нафасини тиклашга ҳаракат қилдим. Тез тиббий ёрдам кўрсатиш бўйича адабиётлар ўқиганман, бундай ҳолатлар футбол майдонида содир бўлганини билганман. Бу борада тажрибам йўқ эди, лекин бундай пайтларда тезкорлик билан ҳаракат қилиш керак», — деди руминиялик футболчи «Чемпионат» мухбири Александр Говоров билан бўлган суҳбатда.

Қайд этиш жоиз, мазкур учрашув «Ванкувер»нинг 2:1 ҳисобидаги ғалабаси билан якун топди.