Хабарингиз бор, 10 сентябрь – 1 октябрь кунлари Колумбияда футзал бўйича Жаҳон чемпионати финал босқичи бўлиб ўтади.
Бугун тонгда ташланган қуръага кўра, Ўзбекистон терма жамоаси мезбон – Колумбия, Португалия ҳамда Панама терма жамоалари билан мусобақанинг "А" гуруҳидан ўрин олди.
Терма жамоамиз етакчиларидан бири Дилшод Ирсалиевнинг мазкур қуръа тақдим этган рақиблар хусусида фикрлари билан қизиқдик.
- Қуръа бизга осон рақиблар тақдим этмаслиги тайин эди. Сабаби мундиалда фақат кучли терма жамоалар қатнашади. Гуруҳимиздан ўрин олган ҳар бир терма жамоа ҳам ўзига яраша кучли жиҳатларга эга. Лекин биз Жаҳон чемпионатида қўлдан келганча муваффақиятли иштирок этиш учун уринамиз. Насиб этса, мундиалда ҳам мухлисларимизни хурсанд қилишга ҳаракат қиламиз, - дейди тажрибали футзалчи SPORTS.uz интернет-портали мухбирига.
Таъкидлаб ўтамиз, тақвимга кўра, Ўзбекистон терма жамоаси гуруҳ босқичини 10 сентябрь куни Панамага қарши ўйин билан бошлайди. Гуруҳ босқичи 2-турида Хосе Мария Мендес жамоаси 13 сентябрь куни Колумбия терма жамоасига қарши ўйнаса, 3-турда 16 сентябрь куни Португалия терма жамоасига қарши майдонга тушади.
