Миландаги «Сан-Сиро» стадиони навбатдаги дербига тайёргарлик кўрмоқда. Фақат бу сафар майдонда «Милан» ва «Интер» эмас, балки «Реал» ва «Атлетико» саф тортишади. Мазкур баҳс ўзининг айрим жиҳатлари орқали мухлислар эътиборини ўзига тортиши мумкин. Қуйида бериладиган 7та факт айнан Мадриднинг икки клуби тўқнашуви билан боғлиқ.
1. 275 марта юзма-юз
«Реал» ва «Атлетико» ўртасидаги дастлабки баҳс узоқ 1928 йили бўлиб ўтган. Ўшанда Испания кубогида «Қироллик клуби» 3:0 ҳисобида ғалаба қозонган. Шундан сўнг жамоалар 275 марта куч синашишди: 145та ўйинда «қаймоқранглилар», 69тасида эса «матрасчилар» зафар қучишган, қолган 61та учрашув дуранг билан хотима топган. Тўплар нисбати - 494-356, «Реал» фойдасига. Охирги марта бу клублар жорий йилнинг февралида ўзаро тўқнаш келишди. Примеро 26-турида «Атлетико» «Сантьяго Бернабеу»дан 1:0 ҳисобидаги ғалаба билан қайтди.
2. Тўпурарлар
Мадрид дербисининг энг яхши тўпурарлари сифатида Альфредо ди Стефано ва Сантьяго Бернабеу тилга олинади. «Реал» шарафини ҳимоя қилган бу футболчилар «Атлетико» дарвозасини 17 мартадан ишғол қилишган. Бернабеу мазкур натижани 19та ўйин давомида қайд этган бўлса, ди Стефанога бунинг учун 26та учрашув ўтказиш талаб этилган. «Атлетико»дан эса бундай шарафга Пако Кампос эришган. Унинг ҳисобида 12та гол бор. Ҳозир тўп сураётган футболчилар орасида эса Криштиану Роналду «Пойтахт дербиси»нинг энг яхши тўпурари бўлиб турибди. Португалиялик юлдуз «матрасчилар»га қарши кечган баҳсларнинг 21тасида майдонга тушиб, 15та гол урган.
3. Уч йилда иккинчи марта
2014 йили Лиссабонда ўтказилган ЕЧЛ финалида Мадриднинг айнан шу икки жамоаси баҳс юритишган, асосий вақт 1:1 ҳисобида якунлангач, ғолиб номини аниқлаш мақсадида ҳакамлар қўшимча бўлимларга мурожаат этишганди. Ўшанда «Реал» Куртуа қўриқлаётган дарвозани яна уч марта ишғол қилиб, совринни ўзиники қилганди. Шунингдек, бу клублар Испания кубоги (ёки Испания лига кубоги) финалида ҳам олти марта тўқнаш келишган. Мазкур қарама-қаршиликларда тўрт марта «Атлетико» зафар қучган.
4. «Атлетико»да мудофаа... «Реал»да ҳужум...
Гарчи Чемпионлар Лигасининг ҳал қилувчи баҳсида бир мамлакат, бир шаҳар шарафини ҳимоя қиладиган жамоалар иштирок этишсада, уларнинг услуби бутунлай бир-биридан фарқ қилади. «Атлетико» ҳимоявий тактика тарафдори. Ҳозирга келиб, Симеоне шогирдлари чемпионатда энг кам тўп ўтказиб юборишган - 16та гол («Реал»да бу кўрсаткич икки баравар кўпни ташкил этади). Ўз навбатида, ла-лигада рақиблар дарвозасини энг кўп ишғол қилиш бўйича «Қироллик клуби»га тенг келадигани йўқ - 105та гол («Атлетико»да - 60та).
5. Ноқулай рақиб
Диего Симеоне «Атлетико» бошқарувига келгач, «Реал»га энг кўп ташвишни айнан шу жамоа туғдириши одат тусига кирди. Бунга ишониш қийин, аммо статистика шуни тасдиқламоқда: бутун 90 дақиқа ҳисобга олинганда, сўнгги 12та баҳс(барча турнирлар ҳисобга олинган)нинг атиги биттасида «Реал» «матрасчилар»дан устун келган. Майли, ЕЧЛ-2014 финалининг қўшимча дақиқаларида қўлга киритилган ғалабани ҳам ҳисобладик, дейлик. Барибир, сўнгги 12та ўйиннинг фақат 2тасини «қаймоқранглилар» ҳисобига ёзиш мумкин бўлади.
6. Еврокубоклардаги дерби
«Атлетико» ва «Реал» халқаро аренада илк бора 1959 йилнинг майида, Европа Чемпионлар Кубоги ярим финалида тўқнаш келишган. Жамоалар уй учрашувларида зафар қучишса, ғолиблик масаласи нейтрал майдонда ўтказиладиган баҳсдан сўнг аниқланарди. Мадрид клублари ким кучли эканига ойдинлик киритиш мақсадида Сарагосадаги «Ромареда» стадонига йўл олишди. Якунда «Реал» 2:1 ҳисобида муваффақият қозонган, ғалаба тўпи Ференц Пушкаш ҳисобига ёзилганди.
Ўша мавсум «Қироллик клуби» ЕЧК ғолибига айланди. Агар 1959 йили сафардаги гол қиймати юқори баҳоланганида, «Реал» бу мукофотдан қуруқ қолиши ҳам мумкин эди.
7. «Реал» - ЕЧЛдаги ғалабалар бўйича рекордчи
Ҳа, ҳозирда Зайниддин Зидан бошқараётган жамоа Европанинг клублар ўртасидаги энг нуфузли турнирида ғалаба қозониш бўйича рекордчи саналади. Жаҳоннинг ҳеч бир клуби ЕЧК|ЕЧЛда 10 марта ғалаба қозонмаган. 1956, 1957, 1958, 1959, 1960, 1966, 1998, 2000, 2002 ва 2014 йилларда «Реал» кўҳна қитъанинг энг кучли клуби номига сазовор бўлган. «Атлетико»га эса ҳозирча бу турнирда ғалаба қозониш насиб этмаган. Икки йил аввал бу мақсадни амалга ошириш йўлида Симеоне жамоасига айнан «Реал» тўсқинлик қилганди. Бу сафар воқеалар қандай ривож олар экан? Бу савол жавобини 28 май куни Миланда оламиз.
Championat.com - Ў.УМАРОВ тайёрлади
