Биласиз, кеча Осиё Чемпионлар Лигасида 1/4 финалнинг дастлабки 4 та иштирокчиси аниқланди. Бугун ҳам чорак финалга йўл оладиган яна 4 та клуб номини билиб оламиз.

Сиз-у бизни қувонтирадиган жиҳати шундаки, ушбу нуфузли турнирда нафақат ўзбек клуби, балки ўзбекистонлик легионер футболчи ўйнайдиган жамоа ҳам ўз юришини давом эттирмоқда. Ҳамюртимиз Сардор Рашидов фаолиятини олиб бораётган Қатарнинг “Ал Жаиш” жамоаси ушбу босқичда Қатарнинг яна бир жамоаси – “Лаҳвия” билан тўқнаш келган. Ушбу жамоаларнинг дастлабки тўқнашувида “Жаиш” 4 та тўп фарқи билан зафар қучиб, жавоб ўйини олдидан жуда яхши имконият хосил қилиб олган эди.

Бугун “Ал Жаиш” ўз уйида “Лаҳвия”га қарши баҳс юритади. Ушбу матч бизнинг вақтимиз билан 21:00да бошланади.

Шунингдек, Осиёда нуфуз жиҳатидан ОЧЛдан кейинги ўринда дея эътироф этиладиган ОФК Кубоги мусобақасида ҳам бугун 1/8 финал учрашувлари давом эттирилади. Ўзбекистон миллий терма жамоасига номзод ярим ҳимоячи Шоҳруҳ Гадоев тўп сураётган Баҳрайннинг “Муҳаррақ” жамоаси ушбу босқичда Иорданиянинг “Файсали” клубига тўқнаш келади. Мазкур ўйин соат 20:45да старт олади.

Кун давомида шу ва бошқа ўйинларга доир маълумотлар бериб борамиз.