Осиё чемпионлар лигасининг нимчорак финалида “Ал Ҳилол”ни мусобақадан чиқариб юборган “Локомотив” энди бор эътиборини олий лигага қаратади. Жамоамиз 30 май куни сафарда “Қўқон-1912″га қарши майдонга тушади.
Жамоамиз мазкур баҳсга тайёргарликни бугундан бошлайди. “Локомотив” айни пайтда 25 очко билан олий лига турнир жадвалида биринчи ўринни эгаллаб турибди. “Қўқон-1912″ ҳисобида эса ҳозирча 6 очко мавжуд ва бу жамоа 14-ўринда бормоқда.
“Локомотив” шунингдек, бу йилги олий лигада ҳали мағлубиятга учрамаган иккита жамоадан бири бўлиб турибди. Худди “Локо” сингари “Бунёдкор” ҳам ютқазмаган. “Қўқон-1912″га келсак, бу жамоа охирги олтита ўйинда мағлуб бўлди.
Шунга қарамай, қўқонликлардан эҳтиёт бўлиш керак. “Локомотив” ўтган йил Қўқонда кечган учрашувни ҳали унутгани йўқ. Ўшанда жамоамиз 2:0 ҳисобида олдинда бораётиб, якунда дуранг ўйнаганди. Шундай экан, олий лигадаги ҳар бир рақиб билан эҳтиёт бўлиб ўйнашга тўғри келади.
“Қўқон-1912″ – “Локомотив” баҳсини Шерзод Қосимов бошқариб боради. Унга қанотларда Наби Рўзимов билан Обид Жумаев кўмак беришади. Собиқ ҳакам Олег Дачев назоратчи вазифасини бажаради.
