Ироқда тўрт нафар террорчи футбол бўйича 2015/16 йилги мавсумнинг Европа Чемпионлар Лигаси финалини кузатиб бораётган 12 нафар мухлисни отиб ўлдирди. Бу ҳақда AS нашрига таяниб, «ТАСС» хабар бермоқда.

28 май, шанба куни Европа Чемпионлар Лигаси финалида Мадриднинг икки клуби – «Реал» ва «Атлетико» ўзаро баҳс олиб борди. Миландаги «Сан-Сиро» стадионида бўлиб ўтган учрашувнинг асосий вақтида 1:1 ҳисоби қайд этилди, пенальтилар сериясида эса «Реал» 5:3 ҳисобида ғалаба қозонди ва 11 марта ЕЧЛ соҳибига айланди.

Нохуш ҳодиса Бағдоддан 50 километр шимоли-шарқда жойлашган Баакуба шаҳрида рўй берди. Қуролланган террорчилар Чемпионлар Лигаси финали намойиши бўлиб ўтаётган хонага бостириб кирди ва ишқибозларни ўққа тутди. Дастлабки маълумотларга кўра, 12 киши ҳалок бўлди, яна 8 нафари турли тан жароҳатлари билан шифохонага етказилди.

Ироқ ҳукуматининг тахминига кўра, мазкур террорчилик ҳаракати ИШИД экстремистик гуруҳи томонидан амалга оширилган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.