ЧЛ-2015|2016нинг энг яхши футболчилари -  Облак ва Навас. Мана, евромавсумнинг бош турнири ҳам тарихнинг бир парчасига айланди. «Темирни қизиғида бос» мақолига амал қилган ҳолда, «плей-офф» раундларида қаҳрамонлик кўрсатган футболчиларни алоҳида  эътироф этсак, бунга қарши чиқувчилар топилмаса керак. Бутун баҳор бўйи барча-барча Криштиану Роналдунинг снайперлик қудратидан, Антуан Гризманнинг қиёси йўқ юришларидан, Артуро Видалнинг ажиб ҳаракатларидан, Кевин де Брюйненинг ақлли ўйинларидан ҳайратланди. Хўш, якун қандай бўлди? Турнирларнинг «қуруқ» рейтингига қарасак, бални дарвозабонлар бошқаришгани аниқ кўринади. Ҳарқалай,  «плей-офф» баҳсларида бош ролларни айнан голкиперлар бажаришди. Хусусан, Ян Облак мавсум охирида барчани ўзи ҳақида гапиришга мажбур қилган бўлса, Кейлор Навасни айримларгина эсга олишди, холос. Ваҳоланки, Коста-рикалик дарвозабон мавсумни шундай барқарор ўтказдики, «Реал» мухлислари Давид де Хеанинг «қаймоқранглар» сафига қўшилмай қолганини батамом унутишди. «Реал» ЧЛнинг «Сантьяго Бернабеу»даги ўйинларида ўз дарвозасини мутлақо дахлсиз сақлаб қолган бирор мавсумни эслай оласизми? Навас шундай натижага эришди. Энди эса жаҳоннинг энг бахтиёр мамлакати - Коста-Рикада мухлислар кўз ёшларини тиёлмаяптилар, ахир уларнинг кумирлари жароҳат сабаб, Америка кубогида иштирок этмайди. Кейлорнинг ўзи ғурурланишга тўла ҳақли, зеро, у гарчи рейтинг бўйича Облакдан ортда қолган бўлсада, «Реал» тарихидан жой олиб улгурди. Ҳар ҳолда, Коста-рикалик кипер учун умумий рейтинг натижасидан кўра, Милан финалининг пенальтилар серияси якуни муҳим ҳисоблангани аниқ. Биласиз, Кейлор «Сан Сиро»да словениялик амплуадошидан устун чиқди.

Уларнинг ўрнида Жо Харт бўлиши мумкин эди

Эътибор беринг, рейтинг бўйича ЧЛ «плей-офф» раундларининг 6 нафар энг яхши футболчисидан 3 нафари дарвозабондир. «Манчестер Сити» посбони Жо Харт ҳам топ-3га кириши ҳеч гап эмасди, аммо финалда 2та жамоа ўйнайди-да. Умуман олганда, «Атлетико» кипери  Ян Облак ҳақли равишда турнирнинг энг яхши футболчиси, деб топилди. «Плей-офф»нинг 7та ўйинида 42та «сэйв» — бу шунчаки, космос! Харт ҳисобида эса 22та «сэйв» бор, Навасники янада озроқ. Оддий айтганда, словениялик дарвозабон «матрасчилар»ни ўз елкасига «миндирганча» финалга олиб чиқди. Унинг қаҳрамонликларини бирма-бир эслашга ҳожат йўқ. Шунчаки, Мюнхенда «Бавария»га қарши кечган ўйинни айтсак кифоя қилади. Ўшанда Облак ҳаттоки, Томас Мюллер томонидан бажарилган пенальтини бартараф этганди. Қолаверса, бошқа вазиятларда ҳам «Атлетико»нинг кўз очишига йўл қўймаган Хосеп Гвардиола жамоасига сира имконият бермаганди. Финал тақдирини ҳал қилган пенальтилар сериясидан сўнг ушбу кипер устидан кулишди. Аммо тан олиш керак, мадридликлар зарбаларни қойилмақом даражада амалга оширишди. Бундай ҳолатда  Облак шунчаки, ожиз эди. Бироқ бу унинг «Бавария» ва «Барселона»га қарши кечган олдинги босқич баҳсларида кўрсатган жонбозликларини хиралаштиролмайди. Ҳа, «Реал» ҳам ўйин пайти унинг дарвозасини шубҳали вазият («офсайд»)дагина ишғол этди.

Финалда гол ва сен энг яхши ҳимоячисан - Серхио Рамос

Финал ўйинидан олдин ҳам Рамос энг яхши ҳимоячилар рейтингида жамоадоши Марселодан орқада эди. «Сан Сиро»да урган голи эса тарози палласини у томон босди. «Атлетико» дарвозаси ишғол қилинган вазиятга турлича қараш мумкин, бироқ факт шуки, ўша гол худди бутун турнир ва финал каби тарих саҳифаларига муҳрланди. Рамос эса ҳар қанча айлантирмайлик, ҳал қилувчи учрашувнинг бош қаҳрамонидир. Умуман олганда, испан йигити аввалги баҳсларда ҳам чакки ҳаракатлангани йўқ. Дейлик, «Реал» «плей-офф» босқичининг атиги 2та ўйинида гол қўйиб юборди - Вольфсбург ва Миланда. Табиийки, бундай натижада марказий ҳимоячининг хизмати жуда катта.

Энг яхши ҳимоячилар учлигига келсак, унда Марселодан ташқари, «Атлетико» вакили, аламзада Хуанфран ҳам бор. «Матрасчилар» мухлислари финалдан сўнг уни ўғил қилиб олишди, ҳисоб. «Темир» Хуанфран пенальтилар серияси хотима топгач, ўзини қандай ҳис этганини тасаввур қилиш қийин эмас. Ахир барчасини унинг зарба йўллашдаги хатоси аниқлади. Лекин Хуанфран жамоа фанатларига ваъда берди: «Ҳали ЧЛда албатта, ғалаба қозонаман». Иродаси мустаҳкам одамларнинг лафзига эса ишониш керак.

Роналду ва Гризманн:

финалдаги хиралик муҳокама учун асос эмас

Португалиялик мега-юлдуз ҳам, шундай даражага тиришаётган франциялик голеадор ҳам финал баҳсини ўз ҳисобига ёзиб қўёлмаса керак. Роналду «Сан-Сиро»да 120 дақиқага йўқолиб қолди ва фақат, ҳал қилувчи пенальтини тепиш учун кўриниш берди, гўё. Унинг асл салоҳиятини назарда тутиб айтсак, худди шундай. Муҳими, Криш 11 метрли зарбаларга нуқта қўйиш миссиясини уддалади. Гризманн эса ўйин вақти нисбатан фаолроқ бўлди, аммо амалга оширилмаган пенальти умумий манзарани бузиб юборди. Ҳа, финал ҳал қилувчи аҳамиятга эга, аммо минг қилса ҳам, битта ўйин. Аввалги учрашувларга қарасак, ўша Облакка  «Атлетико»ни финалгача тортиб келишда энг катта ёрдамни айнан Гризманн кўрсатди. Хусусан, «Барселона» ва «Бавария» билан ўйинларга оёқлари воситасида ўз имзосини қўйиб берди. Роналдуга келсак, у  «Манчестер Сити»га қарши кечган ярим финалнинг илк ўйинини ўтказиб юборди, аммо аввалги раундларда ўз голлари билан «Рома» ҳамда «Вольфсбург»ни роса «йиғлатганди». Ҳар қандай ҳолатда ҳам, Гризманн ва Роналду ўз йўналишларида биринчи бўлишга муносиблар. Ахир улар жамоадошларини финал сари етаклай олдилар. Ҳар ҳолда, бундай қилиш дейлик, Видаль, Мюллер, Суарес ва Месси каби бошқа етакчиларга насиб этгани йўқ.

ЛЧ-2015|2016 «плей-офф» раундларининг энг яхши дарвозабонлари

1. Ян Облак («Атлетико») — 44 очко

2. Кейлор Навас («Реал Мадрид») — 41 очко

3. Жо Харт («Манчестер Сити») — 33 очко

ЛЧ-2015|2016 «плей-офф» раундларининг энг яхши ҳимоячилари

1. Серхио Рамос («Реал Мадрид») — 37 очко

2. Марсело («Реал Мадрид») — 36 очко

3. Хуанфран («Атлетико») — 31 очко

ЛЧ-2015|2016 «плей-офф» раундларининг энг яхши ярим ҳимоячилари

1. Антуан Гризманн («Атлетико») — 29  очко

2. Артуро Видаль («Бавария») — 26 очко

3-4. Фернандиньо («Манчестер Сити») — 25 очко

3-4. Сауль («Атлетико») — 25 очко

ЛЧ-2015|2016 «плей-офф» раундларининг энг яхши ҳужумчилари

1. Криштиану Роналду («Реал Мадрид») — 34 очко

2. Томас Мюллер («Бавария») — 24 очко

3. Луис Суарес («Барселона») — 21 очко

ЧЛ-2015|2016 «плей-офф» раундларининг энг яхши футболчилари

1. Ян Облак («Атлетико») - 44 очко

2. Кейлор Навас («Реал Мадрид») - 41 очко

3. Серхио Рамос («Реал Мадрид») - 37 очко

Championat.com - А. АҲМЕДОВ тайёрлади