Хабарингиз бор, жорий мавсумда "Навбаҳор" сафида учта легионер футболчи тўп суриб келмоқда, кореялик Чой бундан мустасно.

Иккинчи даврада жамоа сафига "Норин" ҳужумчиси Владислав Алексин қўшилиши ҳақида маълумот олдик. Агарда Алексин сафга қўшилса, унда Голбан, Павленко ёки Пишурлардан бири "Навбаҳор"ни тарк этиши лозим. Хўш, жамоадан ким кетгани маъқул?

Россиялик ҳимоячи Игорь Голбан ўтган мавсумдаёқ қўқонлик мухлисларнинг суюклисига айланиб улгурганди. Дарҳақиқат, Голбаннинг ишончли ўйинлари жамоанинг ғалабасига катта ҳисса қўшиб келяпти. Марказий ҳимояда у ва Хайрулла Каримов (баъзи ҳолларда Дилшод Жабборов) ажойиб тандем ҳосил қилишган. Голбан нафақат юқоридан келадиган тўпларни, балки пастлатиб оширилган зарбаларни ҳам бартараф этиб келмоқда. Ундан ташқари, рақиб дарвозасини ҳозирга қадар икки бор ишғол қилишга муваффақ бўлди. Хуллас, Голбан "Навбаҳор" учун керак!

Украиналик ярим ҳимоячи Владислав Павленко дастлаб жамоа ўйинига унчалик қўшилиб кетолмади. Баъзи ҳолларда у захирадан майдонга тушди. Лекин сўнгги ўйинларда у беназир футболчилардан бири эканлиги намоён бўлмоқда. Қизиғи, Павленко дарвозадан ташқари барча чизиқларда бемалол ҳаракат қилиши мумкин. Мисол учун, "Насаф"га қарши кечган учрашувда ҳимоя чизиғида ишончли ҳаракат қилди. Павленко тиним билмай ҳаракат қилади, майдонда асосан қора ишларни бажариб келмоқда. Биргина гол унга етишмаяпти, назаримда. Хуллас, Павленко ҳам керак!

Украиналик бошқа ўйинчи Александр Пишур эса мавсумни ёмон ўтказаётгани йўқ. Ортда қолган учрашувларда Пишур 6 та гол (биттаси Кубок ўйинида) муаллифи бўлди. Бир неча бор ўйиннинг энг яхши футболчиси бўлди. Пишур анча бўйдор футболчи, шу билан бирга анча оғир ҳаракат қилади. Юқоридан келаётган тўпларни эгаллашга ҳаракат қилади. Шу ўринда бир таққослаш. Ўтган мавсум "Навбаҳор"да ўйнаган Улуғбек Бақоев Пишурга қараганда фойдалироқ тўп тепганди. Тепадан келган ҳар қандай тўпни Бақоев эгаллаб оларди. Пишурда эса бу борада камчиликлар бор. Лекин Пишурнинг бир жиҳатига қойил қолдим. У жон-жаҳди билан майдонда ҳаракат қилмоқда! Тўғрими? Пишур "Бунёдкор"да тўп сурган вақтда шундай бор кучи билан ўйнаганмиди? Албатта, йўқ! 

Пишурни "Навбаҳор" учун керак ёки керак эмаслиги ҳақида ишонч билан фикр билдириш қийин. "Норин"даги Алексин ҳам анча бўйдор. Бу ўйинчи юқоридаги тўпни эгаллашдан ташқари, тўп билан эркин ҳаракат қила олади, бемалол олдинга тўп билан ўтиши мумкин, ҳар қандай масофадан дарвозани ишғол қилиши мумкин. Энг муҳими, Алексин ҳам Пишур сингари ўз жамоасида бор кучи билан тўп суриб келмоқда. 

Хўш, азиз мухлис Сиз қандай фикрдасиз?


Ҳусниддин ПАРПИЕВ
Поп тумани, Ғурумсарой қишлоғи.