Тунов куни ҳамкасблардан бири билан тортишиб қолдик. Энди... у ўзимиз қатори ёзув-чизув қилиш билан биргаликда («ижод» дегим келмади, ҳаддим сиғмади) клублардан бирида матбуот котиби сифатида ҳам ишлайди-да. Шунинг учунми, фикримиз бир жойдан чиқиши қийин бўлди - у келишилган ўйинлар борлигини тан олишдан бош тортди, мен эса йўқлигини. Ҳалиям ўз гапимда тураман - олий лигада битта бўлса ҳам келишилган ўйин бор. Исботими? Ҳа, баҳс мана шундан бошланди-да.
Қўл билан тутмасанг, ҳеч кимни ўғирликда айблай олмайсан. Ҳеч қанақа исбот йўқ. Ҳамкасбимиз шундан фойдаланиб, бизнинг тилимизни қисди: «Тутмай туриб ўғирликда айбламанг», - деди. Ўзини ҳақ билди. Менми? Нима ҳам дердим, бутун бошли «Келишилган ўйинларга қарши кураш» қўмитасида бўлмаган исбот-далил оддий журналистда нима қилсин? У ёғини сўрасангиз, уларга ҳам қийин. Ўтган йили нимадир қилмоқчи бўлишганди, яна ўзлари балога қолишди. Ҳа, ўша - «Пахтакор»-«Металлург» учрашувидан сўнг бошланган можарони назарда тутяпман. Бекободликлар «спорт принципларига амал қилмаслик»да айбландилар ва бош мураббий Рустам Мирсодиқов мавсум охиригача футболдан четлатилди. Шундан буён Рустам ака матбуот анжуманларида кўп ҳам иштирок этавермайди. Жаҳли чиққан шекилли. Бунга ҳаққи ҳам бор - чунки ўша жанжалда калтак фақат унинг бошида синди. Негадир Рустам акадан бошқа ҳеч ким жазоланмади. «Пахтакор» билан йил охирида «гаплашиб» қўймоқчи бўлишганди, аммо янги мавсум экваторига яқинлашяпти ҳамки, масала ечимидан дарак йўқ.
Афтидан, «Пахтакор» ўша ўйинда «спорт принциплари»га амал қилган шекилли, ҳеч қандай гап-сўз бўлмади. Бундан эса хулоса қилаверинг, «Келишилган ўйинларга қарши кураш қўмитаси»га қай даражада қийинлигини билиб олишингиз мумкин. Дарҳақиқат, келишувчиларга қарши кураш ҳар доим мана шунақа мушкул бўлади.
Биз - журналистлар эса шунчаки, ўйинни томоша қилиб, шубҳали кўринган нарсаларни тилга оламиз. Аммо реакция - ноль! Бировнинг парвойига ҳам келмайди. Камига клубларнинг кўнглига ўтирмаган жойи бўлса, вазиятни ҳуқуқий орган орқали амалга оширишларини айтиб, дағдаға бошлашади. Лекин ҳозирча ҳеч бири ишни судгача олиб боргани йўқ. Нега дейсизми? Билмадик, ортиқча гап-сўз қўзғамайлик, дейишса керак-да. Ҳақиқатан ҳам, ортиқча гап-сўз кимга керак? Ҳа, яшанг. Биз эса «ошинг ҳалол бўлса, кўчада ич», деб юраверамиз. Ёзаверамиз.
Гарчи бундан бирор наф бўлмаса ҳам, ёзаверамиз. Уч йил олдин ҳамма умидимиз «Келишилган ўйинларга қарши кураш қўмитаси»дан эди. Энди кимдан умид қилишни ҳам билмаймиз. Аммо ёзаверамиз. Ҳамма ҳам эмас, албатта. Баъзи ҳамкасбларимиз, кўриб турганингиздек, «қўл билан тутмай туриб, айбламаслик»ка чақирмоқда. Улар ҳам ўзича ҳақ. Йўқ, агар келишилган ўйинлар дарҳақиқат йўқ бўлса, омадини берсин. Аммо «ҳалигидай» шубҳали натижалар учраб турса, нима қиласиз, ёзасиз-да! Ана, келишилган ўйинлар ростдан ҳам бўлса керакки, ЎФФ ташаббус кўрсатиб, бутун бошли қўмитани ташкил қилди. Бўлмаса бундай ташкилотнинг нима кераги бор эди? Тўғри, Аҳрол Иноятов бошчилик қилаётган қўмита шу вақтгача ҳеч нарсани қойиллатмади. Улар фақат бир иш билан ёдда қолишди - ҳамма клубларни бир жойга тўплаб, ҳалол ўйнаш ҳақида имзо олишди. Қандайдир ҳужжатларга қўл қўйдиришди. Аммо ҳозирча бундан катта самара бўлганини кўрганимизча йўқ.
Биз ҳозир фақат бир нарса - вазиятнинг ижобий тус олишига умид қилишимиз мумкин. Унгача эса - ёзаверамиз. Олий лигада битта бўлса ҳам шубҳали ўйин учрар экан, ёзаверамиз. Исботми? Исбот йўқ.
Хуллас, шундай гаплар. Сўзимиз охирида бир воқеани қистириб ўтсак. Аслида, айтмасак ҳам бўларди-ку... аммо майли. Бугунги мавзуга алоқаси бўлгани учун ҳам гапирмоқчимиз. Гап шундаки, ихтисослигим футбол журналисти бўлгани учун менга ижтимоий мавзуларда чоп этиладиган газеталардан ёрдам сўраб қўнғироқ қилиб туришади. Уларга спорт журналистлари етишмаса керак-да. Хуллас, мана шундай қўнғироқларнинг бирида: «Зафар, сиз қайси клубда матбуот котиби бўлиб ишлайсиз?» деб сўраб қолишди. Аввалига бу саволдан бироз шошиб қолдим. Кейин эса: «Бахтимга ҳеч бирида ишламайман», - деб жавоб қайтардим. Ўшанда ҳеч бир клубда ишламасликни дарҳақиқат бахт деб билишимни ўзим ҳам илк марта пайқагандим. Аммо нима учун дабдурустдан бундай жавоб берганимга ўзимнинг ҳам ақлим етмаган.
Келишилган ўйинлар борасида ҳамкасбим билан бўлиб ўтган ўша мунозарадан сўнг гапимнинг моҳиятига англагандек бўлдим. Сиз ҳам тушундингиз, албатта...
Зафар Қосимов
