Аргентина терма жамоасининг собиқ футболчиси Диего Марадона фикрича, терма жамоа Америка кубогида ғолиб чиқишга қодир. Мусобақанинг финали 26 июнь куни бўлиб ўтади ва унда Херардо Мартино шогирдлари Чили терма жамоасига қарши майдонга тушишади.
«Якшанба куни ғалаба қозонамиз, бунга ишончим комил. Агар ғалаба қозонмасак, у ҳолда футболчилар уйга қайтиб келишмасин», — деди Марадона Marca хабарига кўра.
Эслатиб ўтамиз, Аргентина ва Чили Америка кубоги-2015 финалида ҳам тўқнаш келишганди. Ўйиннинг асосий вақти 0-0 ҳисобида якунлангач, пенальтилар сериясида 4:1 ҳисобида Чили ғалаба қозонганди.
