Уэльс терма жамоаси ҳимоячиси Крис Гантер Европа чемпионатида Исландиянинг Англия устидан ғалабасига хурсанд бўлганига афсусланмаслигини маълум қилди.
"Биз ҳеч нарсадан афсусланмаймиз. Балки ошириб юборгандирмиз, аммо бунинг ёмон жойи йўқ. Биз Уэльснинг қитъа чемпионатида сўнгги Британия вакили эканлигимиздан фахрланамиз. Футболда ҳиссиётлар ғалати тарзда рўй беради. Бизни худди Исландия каби мусобақадан олдин ҳисобдан чиқариб юборган эдилар. Шунинг учун уларнинг ғалабасидан шодланганимиз табиий ҳол.
Биз Исландияни ўзимиз каби яхши ўйин кўрсатаётган кичкина давлат деб биламиз. Биз ҳам улар каби чемпионатнинг финал қисмига қийинчилик билан етиб келдик. Улар бўш келмадилар, ажойиб ўйин кўрсатдилар, бу футбол учун жуда ажойиб", - дейди Гантер.
